രാത്രിമഴ, വാനമ്പാടി എന്നിങ്ങനെയുള്ള ജനപ്രിയ സീരിയലുകളിലൂടെയും ജെയിംസ് ആന്‍ഡ് ആലീസ്, ചെമ്പരത്തിപ്പൂ, ലക്ഷ്യം എന്നിങ്ങനെയുള്ള സിനിമകളിലൂടേയും മലയാളികളുടെ പ്രിയങ്കരിയായ നടിയാണ് ഉമ. ഈ അടുത്തകാലത്താണ് അവര്‍ വലിയൊരു വിവാദത്തില്‍പ്പെട്ടത്. ഒരു ചാനല്‍ അഭിമുഖത്തിനിടയില്‍ മലയാളം കണ്ട എക്കാലത്തെയും മഹാനടനായ ജയനെ കുറിച്ച് ഉമ നടത്തിയ ചില പരാമര്‍ശങ്ങളാണ് വലിയ വിവാദമായത്.
തന്റെ ജീവിതത്തില്‍ ആദ്യമായിട്ടാണ് താന്‍ ഒരു വിവാദത്തില്‍ പെടുന്നതെന്ന് ഉമ പറയുന്നു. ആ പ്രശ്നം രൂക്ഷമായ രണ്ടുദിവസം തനിക്ക് താങ്ങാന്‍ പറ്റിയില്ലെന്നും ആത്മഹത്യ ചെയ്താലോയെന്നുപോലും കരുതിയെന്നും താരം വ്യക്തമാക്കി. ആ സമയത്ത് ശത്രുക്കളായി നിന്നവര്‍ തന്നെ ചേര്‍ത്തുപിടിച്ചു സഹായിച്ചെന്നും മിത്രങ്ങളാണെന്ന് കരുതിയവര്‍ പലരും മാറി നിന്നെന്നും അവര്‍ പറഞ്ഞു.
നമ്മള്‍ എന്താണ് സംസാരിക്കേണ്ടതെന്നും എങ്ങനെയാണ് സംസാരിക്കേണ്ടതെന്നുമുള്ള തിരിച്ചറിവ് ആ സമയത്താണ് ലഭിച്ചത്. ആ രണ്ടു ദിവസത്തിനുള്ളില്‍ താന്‍ മരിച്ചിരുന്നെങ്കില്‍ തന്റെ കുഞ്ഞുങ്ങള്‍ക്കല്ലാതെ മറ്റാര്‍ക്കും ഒരു നഷ്ടവുമില്ലെന്നും ആ പ്രശ്നം അവസാനിച്ചതോടെ തനിക്ക് തുടര്‍ച്ചയായി ഷൂട്ടിങ് ഉണ്ടായിരുന്നതിനാല്‍ അധികം കാടുകേറാന്‍ സമയം കിട്ടിയില്ലെന്നും ഉമ വ്യക്തമാക്കി.
