റോഡിൽ കിടന്ന രണ്ടു യുവാക്കൾ കാർ കയറിയിറങ്ങി മരിച്ചു

പരവൂർ: റോഡിൽ കിടന്ന രണ്ടു യുവാക്കൾ കാർ കയറിയിറങ്ങി മരിച്ചു. പാരിപ്പള്ളി എഴിപ്പുറം പുന്നവിളയിൽ സജാദ് അബ്ദുൽ സമദ് (33), കൂനയിൽ കോട്ടുവങ്കോണം സുശീല ഭവനിൽ ഷിബു (35) എന്നിവരാണ് മരിച്ചത്.

കോട്ടുവങ്കോണം മഹാവിഷ്ണു ക്ഷേത്രത്തിനു മുന്നിലാണ് സംഭവം. സമീപത്തെ ക്ലബ്ബിലെ ഇരുപത്തെട്ടാം ഓണാഘോഷ പരിപാടികളുടെ ഒരുക്കങ്ങൾ പൂർത്തിയാക്കിയ ശേഷം രാത്രി ഇരുവരും ചേർന്ന് വന്ന ബൈക്കിൽ പോകാൻ തയാറായെങ്കിലും ബൈക്ക് തകരാറിലായി. ഇരുവരും തത്കാലം റോഡിൽ കിടന്നു. ഇതിനിടെ പാഞ്ഞുവന്ന ഒരു കാർ ഇവരുടെ ദേഹത്തിൽ കൂടി കയറിയിറങ്ങി. ഉടൻ ഇവരെ പാരിപ്പള്ളി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും രക്ഷിക്കാനായില്ല.

ഇവരെ ഇടിച്ച കാർ പാരിപ്പള്ളി ഭാഗത്തേക്കായിരുന്നു പോയത്. സി.സി.ടിവി ദൃശ്യങ്ങളിൽ നിന്ന് ലഭിച്ച വിവരം വച്ച് പോലീസ് തിരച്ചിൽ തുടങ്ങിയിട്ടുണ്ട്. കൂടുതൽ വിവരങ്ങൾ അറിവായിട്ടില്ല.