ആര്യ 3 വരുന്നൂ, നായകൻ അല്ലു അർജുൻ അല്ല?

ഈ സിനിമയിലൂടെയാണ്, അല്ലു അർജുൻ മലയാളികളുടെ സ്വന്തം മല്ലു അർജുൻ ആയത്,

അല്ലു അർജുനെ നായകനാക്കി സുകുമാർ സംവിധാനം ചെയ്ത ചിത്രമാണ് 'ആര്യ'. അല്ലു അർജുൻ പ്രശസ്തനാക്കിയത് ഈ സിനിമയാണ്. ആര്യ എന്ന ചിത്രത്തിലൂടെ അല്ലു അർജുൻ കേരളത്തിൽ ഉണ്ടാക്കിയ ഓളം ചെറുതൊന്നുമല്ല. ഈ സിനിമയിലൂടെയാണ്, അല്ലു അർജുൻ മലയാളികളുടെ സ്വന്തം മല്ലു അർജുൻ ആയത്. ഒരു റൊമാന്റിക് ഡ്രാമ ഴോണറിൽ എത്തിയ സിനിമ മികച്ച പ്രതികരണങ്ങൾ നേടുകയും ബോക്സ് ഓഫീസിൽ മികച്ച പ്രകടനം കാഴ്ചവയ്ക്കുകയും ചെയ്തിരുന്നു. 

അല്ലു അർജുന്റെ കരിയറിലെ ഏറ്റവും മികച്ച സിനിമയായിട്ടാണ് ആര്യയെ ആരാധകർ കണക്കാക്കുന്നത്. സിനിമയുടെ വൻവിജയത്തെത്തുടർന്ന് സുകുമാർ ചിത്രത്തിന് രണ്ടാം ഭാഗവും ഒരുക്കിയിരുന്നു. ഇതും വലിയ വിജയമായിരുന്നു. ഇപ്പോഴിതാ ചിത്രത്തിന്റെ മൂന്നാം ഭാഗം ഒരുങ്ങുന്നു എന്ന റിപ്പോർട്ടുകളാണ് വരുന്നത്. തെലുങ്കിലെ പ്രശസ്ത നിർമാതാവായ ദിൽ രാജു 'ആര്യ 3' എന്ന ടൈറ്റിൽ അടുത്ത സിനിമയ്ക്കായി രജിസ്റ്റർ ചെയ്തു എന്ന വാർത്ത പുറത്തുവന്നതിന് പിന്നാലെയാണ് മൂന്നാം ഭാഗത്തെക്കുറിച്ചുള്ള വാർത്തകൾ ഉയർന്നുകേട്ടത്. 

എന്നാൽ ആദ്യ രണ്ട് ഭാഗങ്ങളിൽ നായകനായി എത്തിയ അല്ലു അർജുൻ ഈ മൂന്നാം ഭാഗത്തിൽ ഉണ്ടാകില്ലെന്നും പകരം ആശിഷ് എന്ന നായകനാണ് സിനിമയിൽ പ്രധാന റോളിൽ എത്തുന്നതെന്നുമാണ് റിപ്പോർട്ട്. സുകുമാറിന് പകരം മറ്റൊരാളായിരിക്കും സിനിമ സംവിധാനം ചെയ്യുക എന്നും സൂചനകളുണ്ട്. ലവ് മി, റൗഡി ബോയ്‌സ് തുടങ്ങിയ സിനിമകൾ അഭിനയിച്ച നടനാണ് ആശിഷ്. നിർമാതാവ് ദിൽ രാജുവിന്റെ അനന്തരവൻ കൂടിയാണ് ആശിഷ്. ദേവി ശ്രീ പ്രസാദ് ഈണം നൽകിയ സിനിമയിലെ ഗാനങ്ങൾ എല്ലാം ഇന്നും പ്രേക്ഷക പ്രിയങ്കരമാണ്.