ലോക ചാമ്പ്യന്മാര്‍ക്ക് നാണംകെട്ട തോല്‍വി നല്‍കി ശ്രീലങ്ക. ഇതോടെ ഇംഗ്ലണ്ടിന്റെ സെമി സാധ്യതകള്‍ മങ്ങി. ബാംഗ്ലൂര്‍ ചിന്നസ്വാമി സ്റ്റേഡിയത്തില്‍ ടോസ് നേടി ആദ്യം ബാറ്റിംഗ് തിരഞ്ഞെടുക്കുകയായിരുന്നു ഇംഗ്ലണ്ട്. 33.2 ഓവറില്‍ 156 റണ്‍സിന് ഓള്‍ ഔട്ടാവുകയായിരുന്നു മുന്‍ ചാമ്പ്യന്മാര്‍. മൂന്നു വിക്കറ്റ് നേടിയ ലാഹിരു കുമാരയാണ് ഇംഗ്ലണ്ടിനെ മോശാവസ്ഥയില്‍ എത്തിച്ചത്. ഇംഗ്ലണ്ടിനു വേണ്ടി ബെന്‍സ്റ്റോക്‌സിനു മാത്രമാണ് പിടിച്ചുനില്‍ക്കാനായത്. 43 റണ്‍സ് ആണ് ബെന്‍സ്‌ടോക്‌സ് നേടിയത്.
മറുപടി ബാറ്റിങ്ങിനിറങ്ങിയ ശ്രീലങ്ക 25.4 ഓവറില്‍ രണ്ടുവിക്കറ്റ് നഷ്ടത്തില്‍ ലക്ഷ്യം കണ്ടെത്തി. 65 റണ്‍സെടുത്ത സമരവിക്രമയും 77 റണ്‍സെടുത്ത നിസാങ്കയും ശ്രീലങ്കയെ ലക്ഷ്യത്തിലെത്തിച്ചു. ഇതോടെ പോയിന്റ് പട്ടികയില്‍ ഒന്‍പതാം സ്ഥാനത്താണ് ലോക ചാമ്പ്യന്മാരായ ഇംഗ്ലണ്ട്. അഞ്ചു മത്സരങ്ങളില്‍ ഒരു ജയം മാത്രമാണ് ഇംഗ്ലണ്ടിനുള്ളത്. അതേസമയം ശ്രീലങ്ക അഞ്ചാം സ്ഥാനത്തെത്തി.
