ഡെറിക് എബ്രഹാം ഓൺ ദ വേ! - നൂറ് കോടിയില്ല, പക്ഷേ പണം‌വാരാൻ ഇവൻ തന്നെ ധാരാളം!

നൂറ് കോടിയോ വലിയ തള്ളലുകളോ ഇല്ല, പക്ഷേ ഏറ്റവും വലിയ പണം‌വാരി പടമായിരിക്കും ഇതെന്ന് നിർമാതാവ്

നൂറുകോടിയുടെ ബഡ്ജറ്റില്ലെങ്കിലും ഏറ്റവും വലിയ പണം വാരി ചിത്രമായിരിക്കും അബ്രഹാമിന്റെ സന്തതികളെന്ന് നിര്‍മ്മാതാവ് ജോബി ജോര്‍ജ്ജ്. റംസാന്‍ റിലീസായി തിയേറ്ററുകളിൽ എത്തിക്കാനൊരുങ്ങുന്ന ചിത്രത്തെ കുറിച്ച് ഫേസ്ബുക്കിൽ ആകാംഷ പ്രകടിപ്പിച്ച ആരാധകന് മറുപടിയായിട്ടാണ് ജോബി ഇങ്ങനെ പറഞ്ഞത്. 

ഏതായാലും നിർമാതാവിന്റെ വാക്കുകൾ ഇതിനോടകം തന്നെ വൈറലായി കഴിഞ്ഞു. ‘എനിക്ക് അറിയാവുന്ന കാര്യം പറയാം 100 കോടി ബഡ്ജറ്റ് ഇല്ല, വലിയ തള്ളുകളും ഇല്ല, ഞാന്‍ കണ്ടത് വെച്ച് പറഞ്ഞാല്‍ ഗുഡ്‌വില്‍ ചെയ്ത ഏറ്റവും ചെലവേറിയതും, ഏറ്റവും കൂടുതല്‍ പണം വാരി പടവും അബ്രഹാമിന്റെ സന്തതികള്‍ ആയിരിക്കും ഇത് എന്റെ വിശ്വാസം‘. - എന്നായിരുന്നു ജോബിയുടെ കമന്റ്.

മമ്മൂട്ടിയുടെ തന്നെ ഗ്രേറ്റ് ഫാദറിന്റെ സംവിധായകനായിരുന്ന ഹനീഫ് അദനിയാണ് അബ്രഹാമിന്റെ സന്തതികള്‍ക്ക് തിരക്കഥ രചിച്ചിരിക്കുന്നത്. ഗുഡ്വില്‍ എന്റര്‍ടെയ്ന്‍മെന്റ്‌സിന്റെ ബാനറില്‍ ജോബി ജോര്‍ജ്ജാണ് ചിത്രം നിര്‍മ്മിക്കുന്നത്. മമ്മൂട്ടിയെ നായകനാക്കി ഷാജി പാടൂര്‍ സംവിധാനം ചെയ്യുന്ന ചിത്രം ഇതിനോടകം തന്നെ നവ മാധ്യമങ്ങളില്‍ വലിയ ചര്‍ച്ചയായി കഴിഞ്ഞു.

കസബയ്ക്ക് ശേഷം മമ്മൂട്ടി വീണ്ടും പോലീസ് ഓഫീസറുടെ വേഷത്തിലെത്തുന്ന ചിത്രമാണ് ‘അബ്രഹാമിന്റെ സന്തതികള്‍ – A Police Story’. ചിത്രത്തില്‍ ഡെറിക് എബ്രഹാമെന്ന പോലീസ് ഓഫീസറായിട്ടാണ് മമ്മൂട്ടി വേഷമിടുന്നത്. ആന്‍സണ്‍ പോള്‍ മമ്മൂട്ടിക്കൊപ്പം പ്രധാന വേഷത്തിലെത്തുന്നു.  

ആല്‍ബി ഛായാഗ്രഹണവും മഹേഷ് നാരായണന്‍ എഡിറ്റിംഗും ഗോപി സുന്ദര്‍ സംഗീതവും പശ്ചാത്തല സംഗീതവും സന്തോഷ് രാമന്‍ കലാ സംവിധാനവും വീണ സ്യമന്തക് വസ്ത്രാലങ്കാരവും റോണക്‌സ് സേവിയര്‍ ചമയവും നിര്‍വ്വഹിക്കുന്നു.