ജോക്കോവിച്ച് വിംബിൾഡൺ പുരുഷ ചാമ്പ്യൻ: 21-ാം ഗ്രാൻഡ്സ്ലാം കിരീടം

വിംബിൾഡൺ പുരുഷ സിംഗിൾസിൽ കിരീടനേട്ടം സ്വന്തമാക്കി നൊവാക് ജോക്കോവിച്ച്. ഓസ്ട്രേലിയൻ താരം നിക്ക് കിർഗിയോസിനെയാണ് ഫൈനലിൽ ജോക്കോ പരാജയപ്പെടുത്തിയത്. നാല് സെറ്റ് നീണ്ടുനിന്നപോരാട്ടത്തിനൊടുവിലായിരുന്നു ജോക്കോവിച്ചിൻ്റെ വിജയം. സ്കോർ:4-6,6-3,6-4,7-6.

ജോക്കോവിച്ചിൻ്റെ 21മത് ഗ്രാൻഡ്സ്ലാം കിരീടനേട്ടമാണിത്. വിംബിൾഡണിൽ മാത്രം താരത്തിൻ്റെ ഏഴാം കിരീടവും. ഇതോടെ വിംബിൾഡൺ കിരീടനേട്ടത്തിൽ ഇതിഹാസതാരം പീറ്റ് സാംപ്രാസിനൊപ്പമെത്താൻ താരത്തിനായി. 8 വിംബിൾഡൺ കിരീടങ്ങളുമായി സ്വിസ് താരം റോജർ ഫെഡററാണ് പട്ടികയിൽ ഒന്നാമത്.

മത്സരത്തിൻ്റെ തുടക്കത്തിൽ കിർഗിയോസാണ് മികച്ചുനിന്നതെങ്കിലും ശക്തമായി തിരിച്ചുവന്ന ജോക്കോ മത്സരം തൻ്റെ വരുതിയിലാക്കുകയായിരുന്നു.വിജയിച്ചിരുന്നുവെങ്കിൽ വിംബിൾഡൺ നേടുന്ന സീഡ് ചെയ്യപ്പെടാത്ത മൂന്നാമത്തെ താരമെന്നനേട്ടം കിർഗിയോസിന് സ്വന്തമാകുമായിരുന്നു.