മുതിർന്ന നേതാക്കളുടെ മരണത്തിന് പിന്നിൽ പ്രതിപക്ഷത്തിന്റെ ദുർമന്ത്രവാദം: പ്രജ്ഞ സിങ്

ഭോപ്പാൽ: മുൻ കേന്ദ്രമന്ത്രിമാരായ സുഷമാ സ്വരാജിന്റെയും അരുൺ ജെയ്‌ട്ലിയുടെ മരണങ്ങൾക്ക് പിന്നിൽ പ്രതിപക്ഷ പാർട്ടികളുടെ ദുർമന്ത്രവാദമെന്ന് പ്രജ്ഞ സിങ് ഠാക്കൂർ. ബിജെപി നേതാക്കൾക്കെതിരെ പ്രതിപക്ഷം ദുഷ്‌കർമ്മങ്ങൾ നടത്തുകയാണ് എന്ന് പറഞ്ഞുകൊണ്ടായിരുന്നു. പ്രജ്ഞ സിങിന്റെ ആരോപണം.

'തിരഞ്ഞെടുപ്പിന് മുൻപ് ഒരു മഹാരാജ് ജി നമുക്ക് (ബി‌ജെപിക്ക്) മോശം സമയമാണെന്നും പ്രതിപക്ഷം നമുക്കെതിരെ മാരക പ്രായോഗങ്ങൾ നടത്തുന്നുണ്ടെന്നും പറഞ്ഞിരുന്നു. പിന്നീട് ഞാനത് മറന്നു. ഇപ്പോൾ മുതിർന്ന നേതാക്കൾ അടക്കം വിട്ടുപിരിയുമ്പോൾ മഹാരാജ് ജി അന്ന് പറഞ്ഞതിൽ കാര്യമുണ്ടെന്ന് വിശ്വസിക്കാൻ നിർബന്ധിതയാവുന്നു'  പ്രജ്ഞ സിങ് പറഞ്ഞു.    

അരുൺ ജെയ്‌റ്റ്‌ലിക്കും, മധ്യപ്രദേശ് മുൻ മുഖ്യമന്ത്രിയായീരുന്ന ബാബുലാൽ ഗൗറിനും ആദരാഞ്ജലി അർപ്പിക്കാൻ ബിജെപി സംസ്ഥാന ഓഫീസിൽ ചേർന്ന യോഗത്തിനിടെയായിരുന്നു പ്രജ്ഞ സിങിന്റെ പ്രതികരണം.