നോട്ട് നിരോധനത്തില്‍ പുതിയ നിയമവുമായി കേന്ദ്ര സര്‍ക്കാര്‍; വെള്ളിയാഴ്ചക്ക് ശേഷം അസാധു നോട്ടുകൾ കൈവശം വെച്ചാല്‍ അഞ്ചിരട്ടി പിഴ

വെള്ളിയാഴ്ചക്ക് ശേഷം അസാധു നോട്ടുകൾ കൈവശംവെച്ചാൽ പിഴ

നോട്ട് അസാധുവാക്കിയതിനു ശേഷം പുതിയ സാമ്പത്തിക നിയന്ത്രണ നടപടികളുമായി വീണ്ടും കേന്ദ്ര സര്‍ക്കാര്‍. ഡിസംബര്‍ 30ന് ശേഷം നിരോധിച്ച നോട്ടുകള്‍ കൈവശം വെക്കുന്നത് കുറ്റകരമാകുന്ന നിയമം നടപ്പിലാക്കാനാണ് ഇപ്പോള്‍ കേന്ദ്ര സര്‍ക്കാര്‍ ശ്രമിക്കുന്നത്. ഇതോടെ 10,000ല്‍ അധികം രൂപ കൈമാറ്റം ചെയ്യുകയോ സ്വീകരിക്കുകയോ ചെയ്താല്‍ തുകയുടെ അഞ്ചിരട്ടി തുകയോ അല്ലെങ്കില്‍ 50000 രൂപയോ പിഴ ഒടുക്കേണ്ടി വരും. ഇക്കാര്യം നടപ്പിലാക്കുന്നതിനായുള്ള ഓര്‍ഡിനന്‍സ് ഉടന്‍‌തന്നെ ഇറക്കിയേക്കുമെന്നാണ് റിപ്പോര്‍ട്ട്.

വ്യവസ്ഥ ലംഘിക്കുന്നതു സംബന്ധിച്ച കേസ് മുന്‍സിഫ് മജിസ്ട്രേറ്റ് കേട്ടശേഷമാണ് പിഴ തീരുമാനിക്കുക. അടുത്ത മന്ത്രിസഭാ യോഗം ഈ ഓര്‍ഡിനന്‍സ് പരിഗണിക്കുമെന്നാണ് സൂചന. അസാധുവായ 500, 1000 നോട്ടുകള്‍ 10 എണ്ണംവരെ കൈവശം സൂക്ഷിക്കാന്‍ അനുവദിച്ചേക്കും. അനുവദനീയമായ ഈ എണ്ണത്തിനു മുകളില്‍ പണം സൂക്ഷിച്ചാലായിരിക്കും കനത്ത് പിഴ അടക്കേണ്ടി വരിക. പ്രതീക്ഷിച്ചതിനേക്കാള്‍ കൂടുതല്‍ നോട്ട് തിരിച്ചത്തെിയ സാഹചര്യത്തിലാണ് 30നുശേഷം പിഴയടക്കം കടുത്ത നിയന്ത്രണങ്ങള്‍ക്ക് കേന്ദ്രം ആലോചിക്കുന്നത്.