Kerala Rain: 1990ന് ശേഷം ആദ്യം, ഇടുക്കി അണക്കെട്ടിലെ ജലനിരപ്പ് 2,344 അടിയിലെത്തി, മുല്ലപ്പെരിയാറിലും ജലനിരപ്പുയരുന്നു

കാലവര്‍ഷം ശക്തമായതോടെ ഇടുക്കിയിലെ മൂഴിയാര്‍, ലോവര്‍ പെരിയാര്‍, കല്ലാര്‍കുട്ടി, പൊന്മുടി ഡാമുകളില്‍ ജലനിരപ്പ് അപകടകരമായ നിലയില്‍. ഈ ഡാമുകളിലെല്ലാം റെഡ് അലര്‍ട്ട് നിലനില്‍ക്കുകയാണ്. പതിവില്ലാത്ത വിധമാണ് ഇടുക്കി അണക്കെട്ടിലെ ജലനിരപ്പ്. 2344.01 അടിയാണ് നിലവിലെ ജലനിരപ്പ്. 1990ന് ശേഷമാണ് ഇടുക്കി അണക്കെട്ടിലെ ജലനിരപ്പ് ഇത്രയും ഉയരുന്നത്. മുല്ലപ്പെരിയാര്‍ അണക്കെട്ടിലെ ജലനിരപ്പ് 130 അടിക്ക് മുകളിലാണ്.

192.63 മീറ്റര്‍ പരമാവധി സംഭരണശേഷിയുള്ള മൂഴിയാറിലെ ജലനിരപ്പ് 189.60 മീറ്ററിലാണ്. പൊന്മുടിയിലെ ജലനിരപ്പ് 706.50ലെത്തി. 707.75 മീറ്ററാണ് ഡാമിന്റെ പരമാവധി ജലനിരപ്പ്. കല്ലാര്‍കുട്ടി ഡാമിലെ ജലനിരപ്പ് 456.20ലെത്തി. ഇവിടെ 456.59 ആണ് പരമാവധി ജലനിരപ്പ്. ലോവര്‍ പെരിയാറില്‍ 252.90 മീറ്റര്‍ ജലനിരപ്പെത്തി. ഇവിടത്തെ പരമാവധി ജലനിരപ്പ് 253 മീറ്ററാണ്. കഴിഞ്ഞ വര്‍ഷത്തേക്കാള്‍ 12 അടിയോളം വെള്ളമാണ് ഇടുക്കിയില്‍ കൂടുതലുള്ളത്.