ഒമ്പതാം ക്ളാസുകാരി തൂങ്ങിമരിച്ചതിൽ ദുരൂഹത

തിരുവനന്തപുരം: ഒമ്പതാം ക്ലാസുകാരി വീട്ടിൽ തൂങ്ങിമരിച്ച സംഭവത്തിൽ ദുരൂഹത എന്ന് ആരോപണം. വിഴിഞ്ഞം വെണ്ണിയൂർ നെല്ലിവിളാകത്ത് വീട്ടിൽ സുരേഷ് കുമാർ - പ്രമീള ദമ്പതികളുടെ മകൾ കല്ലു എന്ന് വിളിക്കുന്ന അലന്യയെയാണ് മരിച്ച നിലയിൽ കണ്ടെത്തിയത്.

കഴിഞ്ഞ ദിവസം വൈകിട്ട് ഏഴു മണിയോടെ അയൽവാസികളാണ് കുട്ടിയെ തൂങ്ങിമരിച്ച നിലയിൽ കണ്ടെത്തിയത്. വെങ്ങാനൂർ ഗേൾസ് ഹയർ സെക്കണ്ടറി സ്‌കൂളിലെ വിദ്യാർത്ഥിനിയാണ് അലന്യ. സംഭവ സമയം പെൺകുട്ടി വീട്ടിൽ തനിച്ചായിരുന്നു. കുട്ടിയുടെ രക്ഷിതാക്കൾ ബന്ധുവിന്റെ മരണവീട്ടിൽ പോയിരുന്നു. കുട്ടിയെ അയൽവാസിയുടെ വീട്ടിലാക്കിയ ശേഷമായിരുന്നു ഇവർ പോയത്. സന്ധ്യയ്ക്ക് വീട്ടിൽ പോയി ആഹാരം എടുത്തിട്ടു വരാമെന്നു പറഞ്ഞു കുട്ടി പോയി എന്നാണു അയൽക്കാർ പറഞ്ഞത്.

ഏറെ നേരമായിട്ടും കുട്ടിയെ കണ്ടില്ല. കുട്ടിയെ തിരക്കി ചെന്നപ്പോഴാണ് കുട്ടിയെ തൂങ്ങിയ നിലയിൽ കണ്ടെത്തിയത്. വിവരം അറിഞ്ഞു നാട്ടുകാർ പോലീസിൽ അറിയിച്ചു. ഷീറ്റിട്ട വീട്ടിലെ സ്വീകരണ മുറിയിലെ ഇരുമ്പു പൈപ്പിൽ ഷാളുകൊണ്ട് കുരുക്കിട്ട് തൂങ്ങിയ നിലയിലായിരുന്നു മൃതദേഹം. കാൽമുട്ടുകൾ തറയിൽ തട്ടിയിരുന്നതായും ബന്ധു പറയുന്നു. സ്‌കൂൾ യൂണിഫോമായിരുന്നു വേഷം. സംഭവത്തിൽ ദുരൂഹതയുണ്ടെന്നു ബന്ധുക്കളും നാട്ടുകാരും പറയുന്നു. പോലീസ് കേസെടുത്തു അന്വേഷണം ആരംഭിച്ചു.