ഇ പി ജയരാജന്‍ സി‌പി‌എം സംസ്ഥാന സെക്രട്ടറിയാവുമെന്ന് സൂചന

ഇ പി ജയരാജന്‍ സി പി എമ്മിന്‍റെ സംസ്ഥാന സെക്രട്ടറിയാകുമെന്നാണ് റിപ്പോര്‍ട്ടുകള്‍. ഇതു സംബന്ധിച്ച പ്രഖ്യാപനം ഉടനുണ്ടാകുമെന്നും അറിയുന്നു. സംഘടനാ ചുമതലയിലേക്ക് മാറുന്നതിനാലാണ് ഇ പി ജയരാജന് ഇത്തവണ നിയമസഭാ സീറ്റ് നല്‍കേണ്ടതില്ലെന്ന് പാര്‍ട്ടി സംസ്ഥാന സെക്രട്ടേറിയറ്റ് പ്രഖ്യാപിച്ചതിന് കാരണമെന്നാണ് വിവരം.

അഞ്ച് മന്ത്രിമാര്‍ക്ക് സീറ്റ് നല്‍കേണ്ടെന്നാണ് പാര്‍ട്ടി നേതൃത്വം തീരുമാനിച്ചിരിക്കുന്നത്. മാത്രമല്ല, എ പ്രദീപ് കുമാര്‍, രാജു ഏബ്രഹാം തുടങ്ങിയ എം എല്‍ എമാര്‍ക്കും ഇത്തവണ മത്സരിക്കാനാവില്ല.

ഇ പി ജയരാജനെ കൂടാതെ എ കെ ബാലന്‍, ജി സുധാകരന്‍, ടി എം തോമസ് ഐസക്ക്, സി രവീന്ദ്രനാഥ് എന്നീ മന്ത്രിമാരും മത്സരിക്കേണ്ട എന്നാണ് സംസ്ഥാന സെക്രട്ടേറിയറ്റ് തീരുമാനിച്ചിരിക്കുന്നത്. രണ്ട് ടേം എന്ന വ്യവസ്ഥ ഇത്തവണ കര്‍ശനമായി നടപ്പാക്കാനാണ് സെക്രട്ടേറിയറ്റിന്‍റെ തീരുമാനം.

ഇതനുസരിച്ച് റാന്നി എം എല്‍ എ രാജു ഏബ്രഹാം, കോഴിക്കോട് നോര്‍ത്ത് എംഎല്‍എ എ പ്രദീപ് കുമാര്‍ എന്നിവര്‍ക്കും മത്‌സരിക്കാനാവില്ല. 

ഇ പി ജയരാജന്‍റെ മണ്ഡലമായ മട്ടന്നൂരില്‍ ആരോഗ്യമന്ത്രി കെ കെ ശൈലജ മത്‌സരിക്കും. മറ്റ് മന്ത്രിമാരുടെ മണ്ഡലങ്ങളിലേക്ക് പുതുമുഖങ്ങള്‍ എത്തുമെന്നാണ് സൂചന.