ഐപിഎല്ലില്‍ ഇന്ന് ലഖ്‌നൗവും മുംബൈ ഇന്ത്യന്‍സും തമ്മിലുള്ള ആവേശകരമായ മത്സരത്തിനുള്ള കാത്തിരിപ്പിലാണ് ക്രിക്കറ്റ് ആരാധകര്‍. മത്സരത്തിന് മുന്‍പ് മുംബൈ താരങ്ങളും ലഖ്‌നൗ താരങ്ങളും തമ്മില്‍ സൗഹൃദം പുതുക്കുന്നതിനിടെ അര്‍ജുന്‍ ടെന്‍ഡുല്‍ക്കര്‍ തന്നെ പട്ടി കടിച്ച കാര്യം വെളിപ്പെടുത്തിയിരുന്നു. തന്റെ സുഹൃത്തുക്കളായ യുധ്വീര്‍ മൊഹ്‌സിന്‍ ഖാന്‍ എന്നിവരോടാണ് പട്ടി കടിച്ച കാര്യത്തെ പറ്റി അര്‍ജുന്‍ പറയുന്നത്. ഈ വീഡിയോ സമൂഹമാധ്യമങ്ങളില്‍ പങ്ക് വെച്ചിരിക്കുകയാണ് ലഖ്‌നൗ സൂപ്പര്‍ ജയന്‍്‌സ് ടീം അധികൃതര്‍.
മുംബൈ ഇന്ത്യന്‍സിന് വേണ്ടി ഈ സീസണിലെ ചില മത്സരങ്ങളില്‍ അര്‍ജുന്‍ ടെന്‍ഡുല്‍ക്കറും ഇക്കുറി കളിച്ചിരുന്നു. നിലവില്‍ 7 മത്സരങ്ങളില്‍ നിന്നും 12 പോയന്റുമായി മുംബൈ ഐപിഎല്‍ പോയന്റ് ടേബിളില്‍ മൂന്നാം സ്ഥാനത്താണ്. ഇന്ന് ലഖ്‌നൗവുമായി നടക്കുന്ന മത്സരം മുംബൈയ്ക്ക് നിര്‍ണായകമാണ്. മത്സരത്തിന്റെ തലേന്ന് സൗഹൃദം പുതുക്കുന്നതിനിടെയാണ് അര്‍ജുന്‍ പട്ടി കടിച്ച കാര്യം സുഹൃത്തുക്കളുമായി പങ്കുവെച്ചത്. അര്‍ജുനോട് ശ്രദ്ധപുലര്‍ത്താന്‍ സുഹൃത്തുക്കള്‍ നിര്‍ദേശിക്കുന്നതും വീഡിയോയില്‍ കാണാം.
