ഐശ്വര്യ ലക്ഷ്മി,ഷൈന്‍ ടോം ചാക്കോ, സ്വാസിക, തന്‍വി റാം എന്നിവര്‍ക്കൊപ്പം 'കുമാരി' എന്ന ചിത്രത്തില്‍ താനും ഉണ്ടെന്ന് സുരഭി ലക്ഷ്മി. സിനിമയില്‍ ഒരു പ്രധാന കഥാപാത്രത്തെ തന്നെയാണ് അവതരിപ്പിക്കുന്നതെന്നും നടി പറഞ്ഞു. അഞ്ചുമന ക്ഷേത്രത്തില്‍ വെച്ച് നടന്ന 'കുമാരി'യുടെ പൂജ ചിത്രങ്ങള്‍ പങ്കു വെച്ചു കൊണ്ടാണ് പുതിയ വിവരങ്ങള്‍ കൈമാറിയത്.
'രണം' സംവിധായകന്‍ നിര്‍മ്മല്‍ സഹദേവ് ഒരുക്കുന്ന ചിത്രത്തിന്റെ മോഷന്‍ പോസ്റ്റര്‍ പുറത്തിറങ്ങിയിരുന്നു. ഒരു മിസ്റ്ററി ത്രില്ലറിനുള്ള സൂചനയാണ് പോസ്റ്റര്‍ നല്‍കിയത്.
കേരളത്തിന്റെ നാടോടിക്കഥകളെ അടിസ്ഥാനമാക്കിയുള്ള ഒരു പുരാണ കഥയാണ് ഇതെന്നാണ് വിവരം.സംവിധായകന്‍ നിര്‍മ്മലും സച്ചിന്‍ രാംദാസും ചേര്‍ന്നാണ് 'കുമാരി' കഥ എഴുതിയത്.
സര്‍പ്പക്കാവും ഇരുട്ടില്‍ റാന്തലുമായി വരുന്ന ഐശ്വര്യ ലക്ഷ്മിയുമാണ് പോസ്റ്ററില്‍ കാണാനായത്.ജേക്‌സ് ബിജോയ് ആണ് ചിത്രത്തിന് സംഗീതം ഒരുക്കുന്നത്.ജിഗ്മെ ടെന്‍സിംഗ് ഛായാഗ്രഹണവും ശ്രീജിത്ത് സാരംഗ് എഡിറ്റിംഗും നിര്‍വഹിക്കുന്നു. പൃഥ്വിരാജ് പ്രൊഡക്ഷന്റെ ബാനറില്‍ സുപ്രിയ മേനോന്‍ ചിത്രം നിര്‍മ്മിക്കുന്നു.
