ധനുഷിന്റെ ആരാധകര്‍ ആകാംക്ഷയോടെ കാത്തിരിക്കുന്ന ചിത്രം ജഗമേ തന്തിരം നെറ്റ്ഫ്‌ലിക്‌സില്‍. ഐശ്വര്യ ലക്ഷ്മി, ജോജു ജോര്‍ജ് എന്നിവര്‍ പ്രധാന വേഷങ്ങളിലെത്തുന്ന ചിത്രത്തിന്റെ ടീസര്‍ പുറത്തിറങ്ങി. ആക്ഷനും മാസ്സ് ഡയലോഗുകള്‍ അടങ്ങിയ ഒരു ത്രില്ലര്‍ സിനിമയായിരിക്കും ചിത്രം. മധുരയിലെ സുരുലി എന്ന ഗുണ്ടയുടെ വേഷത്തിലാണ് ധനുഷ് എത്തുന്നത്. പിന്നീട് ലണ്ടനിലെ അറിയപ്പെടുന്ന ഗ്യാങ്സ്റ്ററായി നടന്റെ കഥാപാത്രം മാറുകയും തുടര്‍ന്നുണ്ടാകുന്ന സംഭവങ്ങളുമാണ് സിനിമ പറയുന്നത്.
ഇന്നുവരെയുള്ള എല്ലാ തമിഴ് ഡയറക്ട് ഒടിടി റിലീസുകളിലും വെച്ച് വലിയ ബഡ്ജറ്റ് റിലീസ് ചിത്രം കൂടിയാണിത്.വന്‍ തുകയ്ക്കാണ് ചിത്രം വിറ്റുപോയത് എന്നാണ് റിപ്പോര്‍ട്ടുകള്‍.തിയേറ്റര്‍ റിലീസ് ലഭിക്കാത്തതില്‍ ആരാധകരും നിരാശരാണ്. കാര്‍ത്തിക് സുബ്ബരാജ് തിരക്കഥയെഴുതി സംവിധാനം ചെയ്യുന്ന ചിത്രമാണിത്. നടനും സംവിധായകനും ആദ്യമായി ഒന്നിക്കുന്ന ചിത്രമെന്ന പ്രത്യേകത കൂടിയുണ്ട്.അനിരുദ്ധ് രവിചന്ദര്‍ സംഗീതം ഒരുക്കുന്നു. സെവന്‍ സ്‌ക്രീന്‍ സ്റ്റുഡിയോയാണ് ചിത്രം നിര്‍മ്മിക്കുന്നത്.
