ഞാനില്ലാത്ത ദിവസം എന്നെ വിവാഹത്തിന് ക്ഷണിക്കാന്‍ മോള്‍ ഫ്ലാറ്റില്‍ വന്നു, പിന്നീട് വാട്സ് ആപ്പില്‍ ഒരു മെസേജും വന്നു: മകളുടെ വിവാഹത്തിന് പോകാതിരുന്നതിനെക്കുറിച്ച് സായ്‌കുമാര്‍

മകളുടെ വിവാഹത്തിന് താന്‍ പങ്കെടുക്കാതിരുന്നതിനെക്കുറിച്ച് നടന്‍ സായ്കുമാര്‍ വെളിപ്പെടുത്തുന്നു. അതിഥിയായി പങ്കെടുക്കേണ്ടതാണ് മകളുടെ വിവാഹം എന്ന് തോന്നാതിരുന്നതുകൊണ്ടാണ് പങ്കെടുക്കാതിരുന്നതെന്ന് സായ് പറയുന്നു.

‘വനിത’യ്ക്ക് അനുവദിച്ച അഭിമുഖത്തിലാണ് വേദനയോടെ അക്കാര്യം സായ് വ്യക്തമാക്കുന്നത്. കൊല്ലം സ്വദേശിനിയായ പ്രസന്നകുമാരിയാണ് സായ്കുമാറിന്‍റെ ആദ്യഭാര്യ. വൈഷ്ണവിയാണ് മകള്‍. പിന്നീട് സായ്കുമാര്‍ നടി ബിന്ദു പണിക്കരെ വിവാഹം കഴിച്ചു. വൈഷ്ണവിക്ക് വന്ന വിവാഹാലോചനയും കല്യാണ നിശ്ചയവും തന്നെ അറിയിച്ചിരുന്നില്ലെന്ന് സായ്കുമാര്‍ പറയുന്നു. 

“അതുവരെ ഞാന്‍ അധ്വാനിച്ചത് അവര്‍ക്കും മോള്‍ക്കും വേണ്ടിയായിരുന്നു. മോളുടെ ഭാവി സുരക്ഷിതമാക്കേണ്ടത് അച്ഛന്‍റെ കടമയാണ്. എനിക്കുള്ളതെല്ലാം അവര്‍ക്ക് നല്‍കിയത് സന്തോഷത്തോടെയാണ്. പിന്നീട് മോളും എന്നെ കുറ്റപ്പെടുത്തി സംസാരിച്ചു എന്ന് കേട്ടപ്പോള്‍ വിഷമമായി. ഞാന്‍ തിരുത്താനും പോയില്ല. അവളുടെ വിവാഹാലോചനയും നിശ്ചയവും ഒന്നും അറിയിച്ചില്ല. ഞാനില്ലാത്ത ഒരു ദിവസം വിവാഹം ക്ഷണിക്കാന്‍ മോള്‍ ഫ്ലാറ്റില്‍ വന്നു എന്ന് പറഞ്ഞറിഞ്ഞു. പിന്നീട് വാട്സ് ആപ്പില്‍ ഒരു മെസേജും വന്നു. മകളുടെ വിവാഹം അച്ഛനെ അങ്ങനെയാണല്ലോ അറിയിക്കേണ്ടത്. അതിഥികള്‍ക്കൊപ്പം ഒരാളായി പങ്കെടുക്കേണ്ടതല്ലല്ലോ, മകളുടെ വിവാഹം. അതുകൊണ്ട് പോയില്ല” - സായ്കുമാര്‍ വ്യക്തമാക്കുന്നു.