ഉത്തരമറിയാതെ മമ്മൂട്ടി ആരാധകര്‍; പരോളിന്റെ റിലീസ് വീണ്ടും മാറ്റി
ഉത്തരമറിയാതെ മമ്മൂട്ടി ആരാധകര്‍; പരോളിന്റെ റിലീസ് വീണ്ടും മാറ്റി
മമ്മൂട്ടി ആരാധകര്‍ പ്രതീക്ഷയോടെ കാത്തിരിക്കുന്ന പരോളിന്റെ റിലീസിംഗ് തിയതി വീണ്ടും മാറ്റി. ചിത്രം നാളെ തിയേറ്ററുകളില്‍ എത്തുമെന്ന് അണിയറ പ്രവര്‍ത്തകര്‍ നേരത്തെ അറിയിച്ചിരുന്നു. ഇതിനു പിന്നാലെയാണ് സിനിമ പുറത്തിറങ്ങാന്‍ മണിക്കൂറുകള്‍ മാത്രം അവശേഷിക്കെ റിലീസ് മാറ്റിയത്.
സിനിമയുടെ അണിയറ പ്രവര്‍ത്തകര്‍ പുറത്തുവിട്ട റിപ്പോര്‍ട്ട് പ്രകാരം ആറാം തിയതിയാകും പരോള്‍ തിയേറ്ററുകളിലെത്തുക. അതേസമയം, റിലീസിംഗ് തിയതി മാറ്റിയതിന്റെ കാരണം ഇതുവരെ പുറത്തു വന്നിട്ടില്ല.
മേക്കിങ്ങിലും പ്രമേയത്തിലും മമ്മൂട്ടിയുടെ ലുക്കിലും ഏറെ പ്രത്യേകതയുള്ള ചിത്രത്തെക്കുറിച്ചുള്ള പ്രതീക്ഷകള്‍ ഉയര്‍ന്നുകൊണ്ടേയിരിക്കുകയാണ്. സഖാവ് അലക്സ് എന്ന കര്‍ഷകന്റെ ജീവിതത്തില്‍ സംഭവിക്കുന്ന അപ്രതീക്ഷിതമായ സംഭവങ്ങളിലൂടെയാണ് സിനിമ മുന്നേറുന്നത്.
സിനിമയില്‍ രണ്ട് നായികമാരാണുള്ളത്. ഇനിയ മമ്മൂട്ടിയുടെ ഭാര്യയായി അഭിനയിക്കുന്നു. മിയ സഹോദരിയായെത്തുന്നു. ബാഹുബലിയില്‍ കാലകേയ രാജാവിനെ അവതരിപ്പിച്ച തെലുങ്കുനടന്‍ പ്രഭാകറാണ് പരോളിലെ വില്ലന്‍.
സിദ്ദിക്ക്, സുരാജ് വെഞ്ഞാറമ്മൂട് തുടങ്ങിയവരും മികച്ച കഥാപാത്രങ്ങളെ അവതരിപ്പിക്കുന്ന പരോള്‍ സംവിധാനം ചെയ്തിരിക്കുന്നത് നവാഗതനായ ശരത് സന്ദിത് ആണ്. അജിത് പൂജപ്പുരയാണ് തിരക്കഥ രചിച്ചിരിക്കുന്നത്.
ബാംഗ്ലൂരിലും കേരളത്തിലുമായി ചിത്രീകരിച്ച പരോള്‍ ഒരു ത്രില്ലര്‍ മൂഡിലുള്ള ഫാമിലി ഡ്രാമയാണ്. ആന്‍റണി ഡിക്രൂസ് നിര്‍മ്മിച്ചിരിക്കുന്ന സിനിമ സെഞ്ച്വറി ഫിലിംസാണ് പ്രദര്‍ശനത്തിനെത്തിക്കുന്നത്.
എസ് ലോകനാഥന്‍ ക്യാമറ ചലിപ്പിച്ചിരിക്കുന്ന സിനിമയുടെ സംഗീതം ശരത് ആണ്. സില്‍‌വയാണ് ആക്ഷന്‍ രംഗങ്ങള്‍ ചിട്ടപ്പെടുത്തിയത്.
