ഇരുട്ടിന്റെ രാജാവായി അവൻ വരും, മമ്മൂട്ടി നായകൻ, സംവിധാനം - ലിജോ ജോസ് പെല്ലിശേരി !

മലയാള സിനിമയിലെ ചില കൂട്ടുകെട്ടുകൾ നടന്നിരുന്നെങ്കിൽ എന്ന് ആഗ്രഹിക്കാത്ത സിനിമാപ്രേമികൾ ആരെങ്കിലും ഉണ്ടാകുമോ? ഇല്ല. അത്തരത്തിൽ ഓരോ സിനിമാപ്രേമിയും ആഗ്രഹിക്കുന്ന ഒരു കൂട്ടുകെട്ടാണ് മമ്മൂട്ടി - ലിജോ ജോസ് പെല്ലിശ്ശേരി. ഇരുവരും തമ്മിൽ ഒരു ചിത്രം പ്ലാൻ ചെയ്തതുമാണ്. എന്നാൽ, മറ്റ് ചില തിരക്കുകൾ മൂലം ആ ചിത്രം മാറ്റി വെച്ചാണ് ലിജോ അങ്കമാലി ഡയറീസ് ചെയ്തത്.  

അങ്കമാലി ഡയറീസും പിന്നാലെ ജല്ലിക്കെട്ടും വന്നതോടെ ലിജോ മമ്മൂട്ടിച്ചിത്രം ഉപേക്ഷിച്ചു എന്നൊരു വാർത്തയും പരന്നു. എന്നാൽ, ചിത്രം ഉപേക്ഷിച്ചിട്ടില്ലെന്നാണ് പുറത്തുവരുന്ന റിപ്പോർട്ടുകൾ. ചില സാങ്കേതിക കാരണങ്ങളാലും മമ്മൂട്ടിയുടെ ഡേറ്റ് പ്രശ്നം കൊണ്ടും ചിത്രം നീണ്ടുപോകുകയാണെന്നാണ് സൂചന. 

ഫ്രൈഡേ ഫിലിം ഹൗസിന്റെ ബാനറില്‍ വിജയ് ബാബുവും സാന്ദ്രാ തോമസും ചേര്‍ന്ന് ചിത്രം നിര്‍മിക്കുമെന്നായിരുന്നു നേരത്തേ അറിയിച്ചിരുന്നത്. എന്നാല്‍ ഉടമസ്ഥ തര്‍ക്കത്തിനൊടുവില്‍ ഫ്രൈഡേ വിജയ്ബാബു സ്വന്തമാക്കിയ സാഹചര്യത്തിൽ ചിത്രം വിജയ് ബാബു ആയിരിക്കും നിർമിക്കുക എന്നാണ് റിപ്പോർട്ട്. 

ഏതായാലും ലിജോ ചിത്രത്തിൽ മമ്മൂട്ടിയെ കാണാനുള്ള ഉള്ള കാത്തിരിപ്പിലാണ് ഇപ്പോഴും ആരാധകർ.