മക്കളോട് സ്നേഹമില്ലാത്ത അമ്മയല്ല അവൾ, ആ കുട്ടിയെ ഞാൻ തെറ്റു പറയില്ല: ഏഴ് വയസുകാരന്റെ മുത്തശ്ശി

തൊടുപുഴയിൽ ക്രൂരമർദനത്തിനിരയായ ഏഴുവയസ്സുകാരന്റെ അമ്മയെപ്പറ്റി അവരുടെ ആദ്യ ഭർത്താവിന്റെ മാതാവിന്റെ വാക്കുകൾ വൈറലാകുന്നു. ലോകം മുഴുവൻ പഴിച്ചാലും തന്റെ മരുമകളെ അവഗണിക്കാനോ മോശക്കാരിയാക്കാനോ തനിക്ക് കഴിയില്ലെന്ന് അധ്യാപികയായി വിരമിച്ച അമ്മ ഒരു മാധ്യമത്തോട് പറഞ്ഞു. 

‘മക്കളോടു സ്നേഹമില്ലാത്ത അമ്മയല്ല അവൾ. ഭർത്താവ് മരിച്ച് ഏറെക്കഴിയാതെ വേറൊരാളുടെ കൂടെ ഇറങ്ങിപ്പോയി എന്നതു ശരിയാണ്. തടഞ്ഞിട്ടും അവൾ പോയി. പോയ അന്നു മുതൽ അവന്റെ ക്രൂരതകളോരോന്നും അവളും കുഞ്ഞുങ്ങളും സഹിക്കുകയാണ്. അവൾ ആരേയും ഒന്നും അറിയിച്ചില്ല.‘ 

‘നാട്ടുകാരും സമൂഹമാധ്യമങ്ങളും അവളെ തെറ്റുകാരിയാക്കുന്നുണ്ട്. അരുൺ അവളെ മോഹങ്ങൾ കൊടുത്ത് വീഴ്ത്തി. തന്നെയും കുഞ്ഞുങ്ങളെയും പൊന്നുപോലെ നോക്കുമെന്ന് അവൾ കരുതി. എനിക്കവൾ മരുമകളായിരുന്നില്ല, സ്വന്തം മോളെപ്പോലെ തന്നെയായിരുന്നു. അവളെയും കുഞ്ഞുങ്ങളെയും സംരക്ഷിക്കാൻ ഞങ്ങൾ ഒരുക്കമാണ്’.– അധ്യാപികയായി വിരമിച്ച അമ്മ പറയുന്നു. 

‘അവന്റെ ഭീഷണിക്കു മുന്നിൽ അവൾ പതറിയിരിക്കാം. അതുകൊണ്ടാകാം ഒന്നും ആരേയും അറിയിക്കാതെയിരുന്നത്. അവളെയും കുഞ്ഞുങ്ങളെയും അരുൺ പട്ടിണിക്കിട്ടിരുന്നു. ശാരീരികമായി ഉപദ്രവിച്ചിരുന്നു. മകന്റെ പെട്ടെന്നുള്ള മരണത്തിൽ ഞങ്ങൾക്കു സംശയമുണ്ട്. ‘- അവർ പറഞ്ഞവസാനിപ്പിച്ചു.