ഏഷ്യാകപ്പിലെ സൂപ്പർ ഫോർ മത്സരത്തിൽ ഇന്ത്യ ഇന്ന് അഫ്ഗാനിസ്ഥാനെ നേരിടും. രാത്രി 7:30 മുതലാണ് മത്സരം. ഇന്നലെ നടന്ന നിർണായകമായ മത്സരത്തിൽ പാകിസ്ഥാനോട് അഫ്ഗാൻ പരാജയപ്പെട്ടിരുന്നു. പാകിസ്ഥാൻ വിജയിച്ചതോടെ ഏഷ്യാകപ്പിൽ നിന്നും ഇന്ത്യയും അഫ്ഗാനും ഫൈനൽ കാണാതെ പുറത്തായി.
അതിനാൽ തന്നെ ഇന്നത്തെ മത്സരത്തിൽ പുതിയ പരീക്ഷണങ്ങൾ നടത്താൻ ഇന്ത്യ തയ്യാറായേക്കും. ഓസീസിൽ നടക്കുന്ന ലോകകപ്പ് ടീ20 മത്സരങ്ങൾക്കുള്ള പരിശീലനം എന്ന നിലയിൽ ഇന്നത്തെ മത്സരത്തിൽ ഇന്ത്യൻ ടീം പരീക്ഷണങ്ങൾക്ക് തയ്യാറായേക്കും. കഴിഞ്ഞ 2 മത്സരങ്ങളിൽ തിളങ്ങാതിരുന്ന റിഷഭ് പന്തിന് പകരം ദിനേഷ് കാർത്തിക് ടീമിൽ തിരിച്ചെത്തിയേക്കും.
രവീന്ദ്ര ജഡേജയുടെ പകരക്കാരനായ അക്ഷർ പട്ടേൽ ഇന്നത്തെ മത്സരത്തിൽ കളിച്ചേക്കും. മുൻനിരയിൽ കെ എൽ രാഹുൽ ഫോമിലല്ലെങ്കിലും രാഹുലിനെ മാറ്റാൻ ഇന്ത്യ തയ്യാറായേക്കില്ല. ലോകകപ്പിനുള്ള ടീമിൽ ഇതേ മുൻനിര തന്നെ തുടരാനാണ് സാധ്യതയേറെയും.
