കൊറോണയ്‌ക്കെതിരെ നടന്‍ നെടുമുടി വേണു ഇടയ്‌ക്ക കൊട്ടി പാടുന്ന ഗാനം ഫേസ്ബുക്കില്‍ പങ്കുവച്ച് കേരളാ പൊലീസ്. രണ്ട് മിനിറ്റില്‍ താഴെമാത്രം ദൈര്‍ഘ്യമുള്ള ഗാനം സോഷ്യല്‍ മീഡിയയില്‍ ഇതിനോടകം തന്നെ ഹിറ്റായിട്ടുണ്ട്. കൂടാതെ നടന്‍ മോഹന്‍ലാലും തന്റെ പേജില്‍ നെടുമുടി വേണുവിന്റെ ഈ ഗാനം പങ്കുവച്ചിട്ടുണ്ട്.
'കരുതലും ജാഗ്രതയുമായി മഹാമാരിയെ ഈ നാട്ടില്‍ നിന്നും നമുക്ക് തുരത്താം. അതിജീവനത്തിന്റെ പ്രതീക്ഷകള്‍ പങ്കുവച്ച് ഗാനാര്‍ച്ചനയുമായി നെടുമുടി വേണുചേട്ടന്‍' എന്നാണ് വീഡിയോയ്‌ക്കൊപ്പൊം മോഹന്‍ലാല്‍ കുറിച്ചിരിക്കുന്നത്.
'തുരത്തണം തകര്‍ക്കണം ഈ മഹാമാരിയെ...' എന്നാരംഭിച്ചിരിക്കുന്ന ഗാനം മനോജ് എബ്രഹാം ഐപിഎസിന്റെ മേല്‍നോട്ടത്തില്‍ നെടുമുടി വേണു തന്നെയാണ് ആലപിച്ചിരിക്കുന്നത്. പൊലീസിനും ആരോഗ്യപ്രവര്‍ത്തകര്‍ക്കും ആദരവായിട്ടാണ് ഗാനം ചിത്രീകരിച്ചിരിക്കുന്നത്.
