പ്രശസ്‌ത ബോളിവുഡ് നൃത്തസംവിധായിക സരോ‌ജ് ഖാൻ അന്തരിച്ചു

പ്രശസ്‌ത ബോളിവുഡ് നൃത്തസംവിധായികയായ സരോജ് ഖാൻ അന്തരിച്ചു. എഴുപത്തിയൊന്ന് വയസായിരുന്നു.മുംബൈയിലെ ഒരു സ്വകാര്യ ആശുപത്രിയില്‍ വച്ച് വെള്ളിയാഴ്ച പുലര്‍ച്ചെയാണ് മരണം സംഭവിച്ചത്. കഴിഞ്ഞ ജൂൺ 20നാണ് ശ്വാസം എടുക്കാൻ ബുദ്ധിമുട്ട് നേരിട്ടതിനെ തുടർന്ന് ആശുപത്രിയിൽ പ്രവേശിപ്പിച്ചത്. ഇവരെ കൊവിഡ് പരിശോധനകൾക്ക് വിധേയയാക്കിയിരുന്നെങ്കിലും ഫലം നെഗറ്റീവായിരുന്നു.

ബോളിവുഡ് നൃത്തസംവിധാന രംഗത്ത് നാല് പതിറ്റാണ്ടോളമായി സജീവ സാന്നിധ്യമാണ് സരോജ് ഖാൻ. രണ്ടായിരത്തിലധികം ഗാനങ്ങൾക്ക് ഈ കാലയളവിൽ നൃത്തചുവടുകൾ ഒരുക്കിയ സരോജ് ഖാന് മൂന്ന് തവണ മികച്ച കൊറിയോഗ്രാഫര്‍ക്കുള്ള ദേശീയ പുരസ്കാരം നേടിയിട്ടുണ്ട്. ദേവ്ദാസ്, ശൃംഗാരം, ജബ് വി മെറ്റ് എന്നീ ചിത്രങ്ങൾക്കായിരുന്നു ദേശീയ പുരസ്‌കാരം.

ബോളിവുഡിലെ എക്കാലത്തെയും ഹിറ്റ് ഗാനങ്ങളായ എക് ദോ ദീന്‍, ജോളി കെ പീച്ചെ ക്യാഹെ, ഡോലാരെ ഡൊലാരെ എന്നീ ഗാനങ്ങൾക്ക് നൃത്തമൊരുക്കിയത് സരോജ് ഖാനാണ്. തന്‍റെ ഇഷ്ട നടിയായി വിശേഷിപ്പിക്കുന്ന മാധുരി ദീക്ഷിതിന് വേണ്ടിയാണ് അവസാനം ചുവടുകള്‍ ഒരുക്കിയത്.ബോളിവുഡിലെ മുൻനിര താരങ്ങൾ പോലും സരോജ് ഖാനെ മാസ്റ്റർ ജി എന്നാണ് സംബോധന ചെയ്‌തിരുന്നത്.