മോഹന്‍ലാലിന്‍റെ ഭാര്യയായി നദിയ മൊയ്തു അഭിനയിക്കുന്നു. അജോയ് വര്‍മ സംവിധാനം ചെയ്യുന്ന നീരാളി എന്ന ചിത്രത്തിലാണ് നാദിയ നായികയാകുന്നത്. വര്‍ഷങ്ങളുടെ ഇടവേളയ്ക്ക് ശേഷമാണ് മോഹന്‍ലാലും നാദിയയും വീണ്ടും ഒന്നിക്കുന്നത്.
മീന, മീര ജാസ്മിന്‍ തുടങ്ങിയവരെ ഈ കഥാപാത്രത്തിലേക്ക് പരിഗണിച്ചിട്ടുണ്ടായിരുന്നു. മീര അഭിനയിക്കുന്ന കാര്യത്തില്‍ ഏതാണ്ട് തീരുമാനമാകുകയും ചെയ്തിരുന്നു. എന്നാല്‍ ഒടുവില്‍ ആ കഥാപാത്രം നദിയ മൊയ്തുവിലേക്ക് എത്തുകയാണ്. നോക്കെത്താദൂരത്ത് കണ്ണുംനട്ട്, കൂടുംതേടി, കണ്ടു കണ്ടറിഞ്ഞു, പഞ്ചാഗ്‌നി തുടങ്ങിയ ചിത്രങ്ങളിലാണ് മോഹന്‍ലാലും നദിയ മൊയ്തുവും മുമ്പ് ഒരുമിച്ചിട്ടുള്ളത്.
അനേകം വിദേശരാജ്യങ്ങളിലും മുംബൈയിലുമായാണ് നീരാളിയുടെ ചിത്രീകരണം നടക്കുന്നത്. ഒരു ആക്ഷന്‍ ത്രില്ലറാണ് ചിത്രം. നവാഗതനായ സാജു തോമസാണ് നീരാളിയുടെ തിരക്കഥ രചിച്ചിരിക്കുന്നത്. ബിഗ് ബജറ്റില്‍ ഒരുങ്ങുന്ന സിനിമയില്‍ കന്നഡ സൂപ്പര്‍താരം സുദീപാണ് വില്ലന്‍.
ദിലീഷ് പോത്തന്‍, സായികുമാര്‍, സുരാജ് വെഞ്ഞാറമൂട് തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു.
