രാജ്യത്ത് സാമ്പത്തിക മാന്ദ്യമുണ്ട്, അതിന്‍റെ കാരണം കണ്ടെത്താന്‍ കഴിഞ്ഞിട്ടില്ല: മോദിയുടെ സാമ്പത്തിക ഉപദേശക സമിതി

ഒടുവില്‍ പ്രധാനമന്ത്രി നരേന്ദ്രമോദിയുടെ സാമ്പത്തിക ഉപദേശകസമിതിയും അതുതന്നെ പറയുന്നു - രാജ്യത്ത് സാമ്പത്തിക മാന്ദ്യമുണ്ട്. എന്നാല്‍ എന്താണ് മാന്ദ്യത്തിന്‍റെ വ്യക്തമായ കാരണമെന്ന് കണ്ടെത്താനായിട്ടില്ല. സമിതിയുടെ ആദ്യലക്‍ഷ്യം എന്നത് പ്രധാനമന്ത്രിക്ക് ആവശ്യമായ നിര്‍ദ്ദേശങ്ങള്‍ നല്‍കുക എന്നതാണെന്നും സമിതി ചെയര്‍മാന്‍ ബിബേക് ദെബ്രോയി പറഞ്ഞു. 

സാമ്പത്തിക മാന്ദ്യത്തിന് ഒട്ടേറെ കാരണങ്ങളുണ്ടെന്നാണ് ബിബേക് ദെബ്രോയി പറയുന്നത്. പണനയങ്ങള്‍, നികുതി നയങ്ങള്‍, കൃഷി, സാമൂഹിക മേഖല എന്നിവയില്‍ സര്‍ക്കാര്‍ വരുത്തിയ ഇളവുകള്‍ സാമ്പത്തിക മേഖലയെ തളര്‍ത്തി എന്ന വിലയിരുത്തലും സമിതി നടത്തി.

സാമ്പത്തിക വളര്‍ച്ചയ്ക്കും തൊഴിലവസരങ്ങള്‍ സൃഷ്ടിക്കുന്നതിനും ആറു മാസത്തേക്ക് മുന്‍ഗണനാ നിര്‍ദേശങ്ങള്‍ പ്രധാനമന്ത്രിക്കു സമര്‍പ്പിക്കുമെന്നും അദ്ദേഹം വ്യക്തമാക്കി.

2018 ഫെബ്രുവരിയില്‍ വരുന്ന കേന്ദ്രബജറ്റുമായി ബന്ധപ്പെട്ട പ്രവര്‍ത്തനങ്ങള്‍ക്കാണ് മോദിയുടെ സാമ്പത്തിക ഉപദേശക സമിതി ഇപ്പോള്‍ ഊന്നല്‍ നല്‍കുന്നത്.