പ്രണയം ഉപേക്ഷിക്കൻ തയ്യാറാവാത്ത സ്വന്തം മകളെ അച്ഛനും അമ്മയും ചേർന്ന് ചുട്ടുകൊന്നു

ഉത്തർപ്രദേശ്: പ്രണയം ഉപേക്ഷിക്കാൻ തയ്യാറാവാത്തതിനെ തുടർന്ന് ഇരുപത്തിനാലുകാരിയായ സ്വന്തം മകളെ മാതാപിതാക്കൾ ജീവനോടെ ചുട്ടുകൊന്നു. ഉത്തർപ്രദേശിലെ ഉന്നാവോ ജില്ലയിൽ നിന്നുമാണ് രാജ്യത്തെ നടുക്കിയ വാർത്ത. കഴിഞ്ഞ ചൊവ്വാഴ്ചയാണ് സംഭവം നടന്നത്. ഗുരുതരമായി പൊള്ളലേറ്റ യുവതി സംഭവ സ്ഥലത്തുവച്ച് തന്നെ മരിച്ചിരുന്നു.

എന്നാൽ കൊലപാതകം നടത്തിയത് മാതാപിതാക്കളാണെന്ന് ആരും തന്നെ കരുതിയിരുന്നില്ല. കഴിഞ്ഞ ബുധനാഴ്ച തന്റെ മകളെ കാമുകൻ ചുട്ടുകൊന്നു എന്നാരോപിച്ച് പെൺകുട്ടിയുടെ അച്ഛൻ പൊലീസിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ യുവാവിനെ പൊലീസ് കസ്റ്റഡിയിലെടുത്ത് ചോദ്യം ചെയ്തിരുന്നു. എന്നാൽ മാതാപിതാക്കളൂടെ മൊഴികളിൽ വൈരുധ്യം കണ്ടെത്തിയ പോലീസ് ഇവരെ വിശദമായ ചോദ്യം ചെയ്യലിനു വിധേയമാക്കിയപ്പോഴാണ് സത്യം പുറത്തു വന്നത്. പെൺകുട്ടിയുടെ പിതാവിന്റെ കയ്യിൽ പൊള്ളലേറ്റതും പൊലീസ് കണ്ടെത്തി. 

യുവാവുമായുള്ള ബന്ധം അവസാനിപ്പിക്കണം എന്നാവശ്യപ്പെട്ട് തങ്ങൾ മകളെ മർദ്ദിച്ചിരുന്നു എന്നും ബോധരഹിതയായ മകളെ ജീവനോടെ തീകൊളുത്തുകയായിരുന്നു എന്നും മതാപിതാക്കൾ പിന്നീട് പൊലീസിനോട് സമ്മതിച്ചു. ഇരുവരേയും പൊലീസ് അറസ്റ്റ് ചെയ്തിട്ടുണ്ട്.