ഉറങ്ങി കിടക്കവെ കൊതുകുതിരി പുതപ്പിലേയ്ക്ക് വീണു; ദമ്പതികൾ മരിച്ചു

ഉത്തര്‍പ്രദേശിലെ സുഭാഷ്‌നഗര്‍ പ്രദേശത്ത് വെള്ളിയാഴ്ച രാത്രിയാണ് സംഭവം.

ഉറങ്ങി കിടക്കവെ കൊതുകുതിരി പുതപ്പിലേയ്ക്ക് വീണ് ദമ്പതികള്‍ വെന്തുമരിച്ചു. ഉത്തര്‍പ്രദേശിലെ സുഭാഷ്‌നഗര്‍ പ്രദേശത്ത് വെള്ളിയാഴ്ച രാത്രിയാണ് സംഭവം. പപ്പു, രജ്‌നി എന്നിവരാണ് മരിച്ചത്. പുതപ്പിലേക്ക് വീണ കൊതുകുതിരിയില്‍ നിന്ന് തീ പടര്‍ന്നാണ് മരണം.

ഓട്ടോറിക്ഷ തൊഴിലാളിയായ പപ്പുവും ഭാര്യയും ഒറ്റ മുറി വീട്ടില്‍ ആയിരുന്നു താമസം. ഇരുവരും മദ്യപിച്ചിരുന്നെന്നും അതിനാലാകാം രക്ഷപ്പെടാന്‍ സാധിക്കാതിരുന്നതെന്നും വാതില്‍ അകത്തു നിന്ന് കുറ്റിയിട്ട നിലയിലായിരുന്നെന്നും പോലീസ് പറഞ്ഞു.

ഇരുവരുടെയും മൃതദേഹങ്ങള്‍ പോലീസ് പോസ്റ്റ്‌മോര്‍ട്ടത്തിനയച്ചു. സംഭവസ്ഥലത്തെത്തി പോലീസും ഫോറന്‍സിക് അധികൃതരും പ്രാഥമിക അന്വേഷണം നടത്തി. വീടിനുള്ളില്‍ ഉണ്ടായിരുന്ന എല്ലാ വസ്തുക്കളും അഗ്നിക്കിരയായതായി പോലീസ് കൂട്ടിച്ചേര്‍ത്തു.

കഴിഞ്ഞ ഒരു വര്‍ഷമായി ഇരുവരും ഈ വീട്ടിലാണ് താമസം. ഇരുവര്‍ക്കും ഒരു മകനുണ്ടെങ്കിലും പരസ്പരം യാതൊരു ബന്ധവുമില്ല. ഇരുവരും കുറെ നാളായി ഒറ്റയ്ക്കാണ് താമസമെന്നും ഇരുവരും ഒരുമിച്ച് മദ്യപിക്കാറുണ്ടെന്നും വീട്ടുടമസ്ഥ പറഞ്ഞു.