പിന്നില്‍ ദേവസ്വം ബോര്‍ഡ് അംഗവും ഐപിഎസുകാരനായ മകനും; സര്‍ക്കാരിനെതിരെ കൈവിട്ട കളിക്ക് മടിക്കില്ല - ശശികല

സംസ്ഥാന സര്‍ക്കാരിനെതിരെ എന്തു കൈവിട്ട കളിക്കും മടിക്കില്ലെന്ന് ശബരിമല കർമസമിതി അധ്യക്ഷ കെപി ശശികല. ഭക്തജനങ്ങളെ വേദനിപ്പിച്ച ഭരണാധികാരിക്കെതിരെയാണ് നാളത്തെ ഹര്‍ത്താല്‍. ജനവികാരം മാനിക്കാത്ത മുഖ്യമന്ത്രിയെ രാജി വയ്പ്പിക്കും വരെ സമരം തുടരുമെന്നും അവര്‍ വ്യക്തമാക്കി.

കോട്ടയം എസ്‌പി ഹരിശങ്കറും അച്ഛനും ദേവസ്വം ബോർഡ് അംഗവുമായ ശങ്കർദാസും ശബരിമലയിൽ സമാധാനം തകർക്കാൻ മുന്നിട്ടിറിങ്ങിയിരിക്കുകയാണ്. ഇരുവരും ചേര്‍ന്ന് ക്ഷേത്രങ്ങളെ തകർക്കാനുള്ള ശ്രമമാണു നടത്തുന്നതെന്നും ശശികല പറഞ്ഞു.

ദേവസ്വം ബോർഡ് ക്ഷേത്രങ്ങളിലെ വരുമാനം എന്തു വേണമെന്ന് ഇനി വിശ്വാസികൾക്കു തീരുമാനിക്കാം. ഒരു രൂപ പോലും എടുക്കാൻ സർക്കാരിനെ അനുവദിക്കില്ല. കാണിക്ക ഇടേണ്ട എന്നാണ് ഇതുവരെ പറഞ്ഞതെങ്കില്‍  ഇന്നുമുതൽ എടുക്കേണ്ട എന്നു സർക്കാരിനോട് പറയുകയാണെന്നും ശശികല കൂട്ടിച്ചേര്‍ത്തു.