കോടതിയില്‍ നിന്ന് ചാടിപ്പോയ മോഷ്ടാവിനെ ഭാര്യ വീട്ടില്‍ നിന്ന് പിടികൂടി

കോടതിയില്‍ നിന്ന് ചാടിപ്പോയ മോഷ്ടാവിനെ ഭാര്യ വീട്ടില്‍ നിന്ന് പിടിച്ചു. കണ്ണൂരില്‍ കാഞ്ഞങ്ങാട് പെരിയാട്ടടുക്കം റിയാസിനെയാണ് പോലീസ് പിടികൂടിയത്. കഴിഞ്ഞമാസം 22നാണ് പയ്യന്നൂര്‍ ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയില്‍ നിന്നും ഇയാള്‍ ചാടിപ്പോയത്. പിന്നീട് അന്വേഷണങ്ങള്‍ക്ക് ഒടുവില്‍ മട്ടന്നൂരിലെ ഭാര്യവീട്ടില്‍ നിന്ന് ഇയാളെ പോലീസ് പിടികൂടുകയായിരുന്നു. പ്രതി വീടിനുള്ളില്‍ ഉണ്ടെന്നറിഞ്ഞ് പോലീസ് വീട് വളയുകയായിരുന്നു. 2008 ല്‍ നടന്ന ഒരു വാഹന മോഷണ കേസിലെ പ്രതിയാണ് റിയാസ്. 

പഴയങ്ങാടി പോലീസ് ആണ് ഇയാള്‍ക്കെതിരെ കേസ് ചാര്‍ജ് ചെയ്തത്. തുടര്‍ച്ചയായി കോടതിയില്‍ ഹാജരാകാത്തതിനെ തുടര്‍ന്ന് ഇയാള്‍ക്കെതിരെ കോടതി വാറണ്ട് പുറപ്പെടുവിച്ചിരുന്നു. കേസില്‍ റിമാന്‍ഡ് ചെയ്യപ്പെടുമെന്ന് ഉറപ്പായ സാഹചര്യത്തിലാണ് പ്രതി കോടതിയില്‍ നിന്ന് ചാടിപ്പോയത്.