ജിഷ വധക്കേസ്: തുടരന്വേഷണം നടത്തണമെന്ന ആവശ്യവുമായി ജിഷയുടെ പിതാവ് കോടതിയില്‍ ഹര്‍ജി നല്‍കി

തുടരന്വേഷണം നടത്തണം ആവശ്യപ്പെട്ട് ജിഷയുടെ പിതാവ് കോടതിയില്‍

ജിഷ വധക്കേസിൽ തുടരന്വേഷണം നടത്തണമെന്നാവശ്യപ്പെട്ട് ജിഷയുടെ പിതാവ് പാപ്പു കോടതിയില്‍ ഹര്‍ജി നല്‍കി. ഈ കേസില്‍ ബുധനാഴ്ച വിചാരണ ആരംഭിക്കാനിരിക്കെയാണ് എറണാകുളം പ്രിൻസിപ്പൽ സെഷൻസ് കോടതിയിൽ പാപ്പു ഹർജി നൽകിയത്. ഹര്‍ജി ഫയലില്‍ സ്വീകരിച്ച കോടതി തുടരന്വേഷണം നടത്തണമെന്ന പാപ്പുവിന്റെ ആവശ്യത്തില്‍ നാളെ വാദം കേള്‍ക്കും.

ജിഷവധക്കേസിലെ അന്വേഷണസംഘത്തിന്റെ കണ്ടെത്തലുകള്‍ പലതും വാസ്തവവിരുദ്ധമാണെന്ന് കോടതിയില്‍ സമര്‍പ്പിച്ച ഹര്‍ജിയില്‍ പാപ്പു ആരോപിക്കുന്നുണ്ട്. കൂടാതെ ജിഷ കൊല്ലപ്പെട്ട സമയം സംബന്ധിച്ച് പോസ്റ്റ്‌മോര്‍ട്ടം റിപ്പോര്‍ട്ടിലും കുറ്റപത്രത്തിലും വൈരുദ്ധ്യമുണ്ടെന്നും പ്രതി അമീറുൽ ഇസ്‍ലാം ഒറ്റയ്ക്കാണ് കൊല നടത്തിയതെന്ന പൊലീസ് വാദം വിശ്വസിക്കാനാവില്ലെന്നും ഹർജിയിൽ ചൂണ്ടിക്കാട്ടുന്നുണ്ട്.