ട്രെയിനിൽ മദ്യപിച്ചു പെൺകുട്ടിയെ ശല്യം ചെയ്ത യുവാക്കൾ പിടിയിൽ

കണ്ണൂർ: ട്രെയിനിൽ യാത്ര ചെയ്യവേ മദ്യ ലഹരിയിൽ പെൺകുട്ടിയെ ശല്യം ചെയ്ത മൂന്നു യുവാക്കളെ പോലീസ് അറസ്റ്റ് ചെയ്തു. ഫയാസ്, മുഹമ്മദ് ഷാഫി, അബ്ദൽ വാഹിദ് എന്നിവരാണ് പിടിയിലായത്. കഴിഞ്ഞ ദിവസം വൈകിട്ട് കണ്ണൂരിലെ വളപട്ടണം റയിൽവേ സ്റേഷനിലായിരുന്നു സംഭവം. നാഗർകോവിൽ - മംഗലാപുരം ഏറനാട് എക്സ്പ്രസിലായിരുന്നു സംഭവം.

ഇവർ ട്രെയിനിൽ ഉച്ചത്തിൽ പാട്ടുപാടുകയും മദ്യപിച്ചു ബഹളം വയ്ക്കുകയും ചെയ്തപ്പോൾ ട്രെയിനിലെ യാത്രക്കാരിയായ യുവതി ചോദ്യം ചെയ്തതാണ് സംഭവത്തിനു തുടക്കം. മാഹിയിൽ നിന്നാണ് മൂവരും ട്രെയിനിൽ കയറിയത്. ഇതോടെ ഇവർ യുവതിക്ക് നേരെ അപമര്യാദയായി പെരുമാറുകയായിരുന്നു. കണ്ണൂരിലേക്ക് പോവുകയായിരുന്ന ഇവർ വളപട്ടണം വരെ ബഹളം തുടർന്ന്. സഹികെട്ട യാത്രക്കാർ ചെയിൻ വലിച്ചു ട്രെയിൻ നിർത്തി.

വളപട്ടണം പോലീസ് എത്തി മൂവരെയും പിടികൂടുകയും തുടർന്ന് ആർ.പി.എഫിന് കൈമാറുകയും ചെയ്തു. കാഞ്ഞങ്ങാട് റയിൽവേ സ്റ്റേഷനിൽ ഇറങ്ങിയ യുവതി പക്ഷെ പൊലീസിന് രേഖാ മൂലം പരാതി നൽകാൻ തയാറായില്ല. പൊതുസ്ഥലത്ത് മദ്യപിച്ചു പ്രശ്നങ്ങൾ ഉണ്ടാക്കി എന്ന കുറ്റം ചുമത്തിയാണ് മൂന്നു യുവാക്കൾക്കും എതിരെ കേസെടുത്തത്.