ആക്രമണ കേസിലെ പ്രതി എസ്.ഐ യെ ആക്രമിച്ച ശേഷം ഓടി രക്ഷപെട്ടു

പൂയപ്പള്ളി: കഞ്ചാവ് കേസ്, ആക്രമണ കേസ് എന്നിവയിലെ പ്രതി മറ്റൊരു കേസില്‍ അന്വേഷണം നടക്കവേ എസ്.ഐ യെ ആക്രമിച്ച ശേഷം ഓടി രക്ഷപെട്ടു. ചെറുവക്കല്‍ കോട്ടൂര്‍ക്കുന്നു ഇടയിറയത്ത് വീട്ടില്‍ ഷിബു എന്ന പ്രകാശാണ് (44) എസ്.ഐ യെ ആക്രമിച്ച ശേഷം ഓടി രക്ഷപ്പെട്ടത്.

ഷിബുവിന്റെ ആക്രമണത്തില്‍ പരുക്കേറ്റ പൂയപ്പള്ളി പോലീസ് സ്റ്റേഷനിലെ എസ്.ഐ കൃഷ്ണന്‍കുട്ടി ചികിത്സയിലാണ്. കൈക്ക് ഒടിവേറ്റ  ഇദ്ദേഹം കൊട്ടാരക്കര താലൂക്ക് ആശുപത്രി യിലാണുള്ളത്.  ചാരായം വാറ്റ്, കഞ്ചാവ് കേസുകളില്‍ ജാമ്യത്തിലിറങ്ങിയ പ്രതി ചെറുവക്കല്‍ സ്വദേശിനിയുടെ വീട്ടില്‍ അതിക്രമിച്ചു കയറി അസഭ്യം പറയുകയും ചില ബന്ധുക്കളെ ആക്രമിക്കുകയും ചെയ്തതായി പരാതി ഉണ്ടായി. ഇതുമായി അന്വേഷിക്കാനെത്തിയപ്പോള്‍ പ്രകാശിനെ പിടികൂടി ജീപ്പില്‍ കയറ്റുന്നതിനിടെയാണ് ആക്രമണം ഉണ്ടായത്.

പ്രകാശ് എസ്.ഐ യെ ചവിട്ടിവീഴ്ത്തിയ ശേഷം ഓടി രക്ഷപ്പെടുകയായിരുന്നു. പ്രകാശിനെതിരെ നിരവധി ക്രിമിനല്‍ കേസുകളുണ്ട്. പ്രതിക്കായി വ്യാപക അന്വേഷണം ആരംഭിച്ചു.