നാല് പുതിയ ഹോട്ട്‌സ്പോട്ടുകൾ, മാസ്‌ക് ധരിക്കാത്തതിൽ ഇന്ന് 954 കേസുകൾ

തിരുവനന്തപുരം: മാസ്‌ക് ധരിക്കാത്തതിനെ തുടർന്ന് വ്യാഴാഴ്ച്ച വൈകീട്ട് നാല് മണി വരെ സംസ്ഥാനത്ത് രജിസ്റ്റർ ചെയ്‌തത് 954 കേസുകൾ.കൊവിഡ് കേസുകൾ കൂടിവരുന്ന സാഹചര്യത്തിൽ സംസ്ഥാനത്ത് ഇന്ന് മുതലാണ് പൊതുസ്ഥലങ്ങളിലും ജോലിസ്ഥലങ്ങളിലും മാസ്‌ക് നിർബന്ധമാക്കിയത്.ഈ സാഹചര്യത്തിലാണ് ഇന്ന് നിയമം ലംഘിച്ച് പുറത്തിറങ്ങിയവർക്കെതിരെ കേസ് എടുത്തത്.

അതേസമയം രോഗബാധയെ തുടർന്ന് സംസ്ഥാനത്ത് ഇന്ന് നാല് പുതിയ ഹോട്ട്സ്പോട്ടുകൾ കൂടി പ്രഖ്യാപിച്ചു.തിരുവനന്തപുരം ജില്ലയിലെ നെയ്യാറ്റിന്‍കര മുനിസിപ്പാലിറ്റി,കൊല്ലം ജില്ലയിലെ ഓച്ചിറ, തൃക്കോവില്‍വട്ടം പഞ്ചായത്തും ഉദയനാപുരം പഞ്ചായത്തുമാണ് പുതിയതായി ഹോട്ട്സ്‌പോട്ട് പട്ടികയിലുള്ളത്. മൊത്തം എഴുപത് പ്രദേശങ്ങളാണ് സംസ്ഥാനത്ത് ഇപ്പോൾ ഹോട്ട്‌സ്പോട്ട് പട്ടികയിലുള്ളത്.