എല്ലാ ജീവനക്കാർക്കും 1.12 ലക്ഷം രൂപയോളം ബോണസ്, ഞെട്ടിച്ച് മൈക്രോസോഫ്‌റ്റ്

തങ്ങളുടെ എല്ലാ ജീവനക്കാർക്കും 1.12 ലക്ഷം രൂപയോളം ബോണസ് നൽകി ടെക് ഭീമന്മാരായ മൈക്രോസോഫ്‌റ്റ്. പാൻഡമിക് ബോണസ് എന്ന നിലയിലാണ് 1500 ഡോളർ സാമ്പത്തിക സഹായം. കഴിഞ്ഞ സാമ്പത്തിക വര്‍ഷം വളരെ ദുര്‍ഘടമായ അവസ്ഥയിലും ജോലി ചെയ്ത ജീവനക്കാര്‍ക്കുള്ള അംഗീകാരമായാണ് ഈ തുക എന്നാണ് വിശദീകരണം.

ദ വെർജ് പുറത്ത് വിട്ട വാർത്തകൾ പ്രകാരം മാര്‍ച്ച് 31,2021 ന് മുന്‍പ് കമ്പനിയില്‍ ചേര്‍ന്ന എല്ലാ കോര്‍പ്പറേറ്റ് വൈസ് പ്രസിഡന്‍റുമാര്‍ക്ക് താഴെയുള്ള ജീവനക്കാര്‍ക്കും മൈക്രോസോഫ്റ്റ് ഈ ബോണസ് അനുവദിച്ചിട്ടുണ്ട്. താൽകാലി‌ക പാർട്ട് ടൈം ജീവനക്കാർക്കും ഈ ആനുകൂല്യം നൽകും. മൈക്രോസോഫ്റ്റ് ചീഫ് പീപ്പിള്‍ ഓഫീസര്‍, കത്തലിന്‍ ഹോഗനാണ് ഈ ബോണസ് പ്രഖ്യാപിച്ചത്. അമേരിക്കയിലും, അന്താരാഷ്ട്ര തലത്തിലും ഉള്ള എല്ലാ ജീവനക്കാര്‍ക്കും ഈ ആനുകൂല്യം ലഭ്യമാകും.

1,75,508 ജീവനക്കാരാണ് മൈക്രോസോഫ്‌റ്റിനുള്ളത്. അതേസമയം മൈക്രോസോഫ്റ്റ് നടത്തുന്ന ലിങ്കിഡ്ഇന്‍, ജിറ്റ്ഹബ്, സെനിമാക്സ് പോലുള്ള സ്ഥാപനങ്ങളിലെ ജീവനക്കാര്‍ പാന്‍ഡമിക്ക് ബോണസ് ലഭിക്കില്ലെന്നാണ് വിവരം.താണ്ട് 200 ദശലക്ഷം അമേരിക്കന്‍ ഡോളറാണ് പാന്‍ഡമിക്ക് ബോണസിന് വേണ്ടി മൈക്രോസോഫ്റ്റ് ചിലവഴിക്കുന്നത്.