ഡിജിറ്റൽ ഇന്ത്യ: രാജ്യത്തെ ഇന്റർനെറ്റ് ഉപഭോക്താക്കൾ 2025ൽ 90 കോടിയിലെത്തുമെന്ന് റിപ്പോർട്ട്

ഇന്ത്യയിൽ ഇന്റർനെറ്റ് ഉപയോഗിക്കുന്നവരുടെ എണ്ണം 2025ൽ 90 കോടിയിലെത്തുമെന്ന് റിപ്പോർട്ട്. ഗ്രാമീണ മേഖലയിലെ ഇന്റർനെറ്റ് ഉപയോഗത്തിൽ കാര്യമായ വർധനവാണുണ്ടായതെന്ന് ഇന്റർനെറ്റ് ആൻഡ് മൊബൈൽ അസോസിയേഷൻ(ഐഎഎംഎഐ‌) റിപ്പോർട്ടിൽ പറയുന്നു.

കഴിഞ്ഞവർഷം 62.2 കോടിയായിരുന്നു രാജ്യത്ത് ഇന്റർനെറ്റ് ഉപയോഗിക്കുന്നവരുടെ എണ്ണം. ഇതിൽ 45 ശതമാനം വർധനവാണ് 2025ൽ പ്രതീക്ഷിക്കുന്നത്. നഗരപ്രദേശങ്ങളിൽ നാല് ശതമാനം വർധനവാണുണ്ടായത്. 32.3 കോടിയായിരുന്നു(67%) 2020ലെ നഗരമേഖലയിൽ ഇന്റർനെറ്റ് ഉപയോഗിക്കുന്നവരുടെ എണ്ണം. ഗ്രാമീണ മേഖലയിൽ 29.9കോടി പേരായിരുന്നു(31%) ഇന്റർനെറ്റ് ഉപയോഗിച്ചിരുന്നത്.

നഗര,ഗ്രാമ വ്യത്യാസമില്ലാതെ കൂടുതൽ പേർ മൊബൈൽ വഴിയാണ് ഇന്റർനെറ്റ് ഉപയോഗിക്കുന്നത്.ഇന്റർനെറ്റ് ഉപയോഗിക്കുന്നവരിൽ പത്തിൽ ഒമ്പത് പേരും ദിവസവും നെറ്റിലെത്തുന്നുണ്ട്. ശരാശരി 107 മിനിറ്റാണ് ഇവർ ഇന്റർനെറ്റിൽ ചിലവഴിക്കുന്നത്.