'ദളപതി 65' ഒരുങ്ങുകയാണ്. വിജയും നെൽ‌സൺ ദിലീപ് കുമാറും ഒന്നിക്കുന്ന ചിത്രം സൺ പിക്ചേഴ്സ് ആണ് നിർമ്മിക്കുന്നത്. ശിവകാർത്തികേയൻറെ 'ഡോക്ടർ' റിലീസിന് ശേഷം മാത്രമേ ഈ സിനിമ ആരംഭിക്കുകയുള്ളൂ എന്നാണ് പ്രതീക്ഷിച്ചിരുന്നത്. എന്നാല്‍ 'ദളപതി 65' ഷൂട്ടിംഗ് ഉടൻ തന്നെ ആരംഭിക്കുമെന്നാണ് പുതിയ റിപ്പോർട്ടുകൾ. ഇതൊരു ഹ്രസ്വ ഷെഡ്യൂൾ ആണെന്നും പറയപ്പെടുന്നു. 'ഡോക്ടർ' റിലീസിന്റെ തിരക്കിലാകുന്നതിന് മുമ്പ് സംവിധായകൻ ഈ ഷെഡ്യൂൾ പൂർത്തിയാക്കാനാണ് പദ്ധതിയിടുന്നത്.
വിജയ്ക്കൊപ്പമുള്ള സൺ പിക്ചേഴ്സിന്റെ രണ്ടാമത്തെ ചിത്രം കൂടിയാണിത്. നടി പൂജ ഹെഗ്‌ഡെ വിജയുടെ നായികയായി എത്തുമെന്നാണ് വിവരം. അരുൺ വിജയും ഈ പ്രൊജക്ടിൽ ഒപ്പുവെച്ചു എന്നാണ് റിപ്പോർട്ടുകൾ. ഔദ്യോഗിക സ്ഥിരീകരണം ഇതുവരെ പുറത്തുവന്നിട്ടില്ല. പൂജ നായികയായി എത്തുമ്പോൾ അരുൺ വിജയ് വില്ലൻ കഥാപാത്രത്തെ അവതരിപ്പിക്കുന്നു.
2022 പൊങ്കലിന് റീലീസ് ചെയ്യാനാണ് നിർമാതാക്കൾ പദ്ധതിയിടുന്നത്. ഡാർക്ക് കോമഡി വിഭാഗത്തിൽ പെടുന്ന ചിത്രമായിരിക്കുമിത്. അനിരുദ്ധ് രവിചന്ദർ സംഗീതമൊരുക്കുന്നു.
