റോഷന്‍ ആന്‍ഡ്രൂസിന് വിലക്ക്, ഇനി പന്ത് ദിലീപിന്‍റെ കോര്‍ട്ടില്‍ ?

നിര്‍മ്മാതാവ് ആല്‍‌വിന്‍ ആന്‍റണിയുടെ വീട്ടില്‍ ആക്രമണം നടത്തിയതുമായി ബന്ധപ്പെട്ട കേസില്‍ സംവിധായകന്‍ റോഷന്‍ ആന്‍ഡ്രൂസിന് നിര്‍മ്മാതാക്കളുടെ സംഘടന വിലക്കേര്‍പ്പെടുത്തി. നിര്‍മ്മാതാവ് ആല്‍‌വിന്‍ ആന്‍റണിയുടെ പരാതിയിലാണ് റോഷനെതിരെ നിര്‍മ്മാതാക്കള്‍ കടുത്ത നിലപാടിലേക്ക് നീങ്ങിയത്.

റോഷന്‍ ആന്‍ഡ്രൂസുമായി സിനിമ ചെയ്യുന്ന നിര്‍മ്മാതാക്കള്‍ ഇനി അസോസിയേഷനെ അറിയിക്കണമെന്നും അസോസിയേഷന്‍റെ നിര്‍ദ്ദേശപ്രകാരമായിരിക്കും തുടര്‍നടപടികള്‍ ഉണ്ടാവുകയെന്നും നിര്‍ദ്ദേശമുണ്ട്.

ഈ വിഷയത്തില്‍ ഒരു തരത്തിലുള്ള മധ്യസ്ഥ ചര്‍ച്ചയ്ക്കും നിര്‍മ്മാതാക്കളുടെ സംഘടന തയ്യാറല്ല. ആല്‍‌വിന്‍ ആന്‍റണി ഡിജിപിക്കാണ് പരാതി നല്‍കിയിരിക്കുന്നത്.

അതേസമയം, നിര്‍മ്മാതാക്കളുടെ സംഘടന ഇപ്പോഴും ദിലീപിന്‍റെ നിയന്ത്രണത്തിലാണെന്നും അതുകൊണ്ടുതന്നെ റോഷന്‍റെ കാര്യത്തില്‍ യാതൊരു വിധ വിട്ടുവീഴ്ചയും ഉണ്ടാകില്ലെന്നും സിനിമയ്ക്കുള്ളില്‍ തന്നെ സംസാരമുണ്ട്. ‘ഹൌ ഓള്‍ഡ് ആര്‍ യു’ സിനിമയുമായി ബന്ധപ്പെട്ട വിഷയത്തില്‍ ദിലീപും റോഷന്‍ ആന്‍ഡ്രൂസും തമ്മില്‍ തെറ്റിയെന്നും ഇപ്പോഴത്തെ സാഹചര്യം മുതലാക്കാന്‍ ദിലീപ് ഇടപെടുമെന്നുമാണ് പിന്നാമ്പുറ വര്‍ത്തമാനം.