മമ്മൂട്ടി വേണ്ടെന്ന് വെച്ചു, മോഹൻലാൽ ഏറ്റെടുത്തു! - പക്ഷേ ആ ചിത്രം യാഥാർത്ഥ്യമാകില്ല?!

രഞ്ജിത്തിന് മോഹൻലാലിനേയും വേണ്ട?

ലോഹത്തിനു ശേഷം മോഹൻലാലും രഞ്ചിത്തും ഒന്നിക്കുന്ന പുതിയ ചിത്രം ബിലത്തിക്കഥ ഓണത്തിന് തീയറ്ററുകളിലെത്തുമെന്ന് സൂചനകളുണ്ടായിരുന്നു. എന്നാൽ, ബിലാത്തിക്കഥ ഉപേക്ഷിച്ചുവെന്നും പകരം മറ്റൊരു ചിത്രവുമായി രഞ്ജിത്തും മോഹൻലാലും ഒന്നിക്കുമെന്നും റിപ്പോർട്ടുകൾ വരുന്നു. 

നേരത്തേ മെയ് പത്തുമുതൽ ജൂൺ ഇരുപത്തഞ്ച് വരേയായിരുന്നു ചിത്രത്തിനായി മോഹൻലാൽ നൽകിയ ഡേറ്റ്. എന്നാൽ, മറ്റ് ചിത്രങ്ങളുടെ തിരക്കിലാണ് താരം. ബിലാത്തിക്കഥയ്ക്ക് തിരക്കഥ തയ്യാറാക്കിയ സേതു തന്നെയാണ് സിനിമ സംവിധാനം ചെയ്യുന്നതെന്നുള്ള റിപ്പോര്‍ട്ടുകളാണ് ഇപ്പോള്‍ പുറത്തുവന്നിട്ടുള്ളത്.

ലില്ലി പാഡ് മോഷന്‍ പിക്‌ചേഴ്‌സിന്റെയും വര്‍ണ്ണചിത്ര ഗുഡ്ലൈന്‍ പ്രൊഡക്ഷന്‍സിന്റെയും ബാനറില്‍ സുബൈര്‍ എന്‍. പി, എന്‍. കെ. നാസര്‍ എന്നിവര്‍ ചേർന്നാണ് ബിലാത്തിക്കഥ നിർമ്മിക്കുന്നത്. അനു സിത്താര, ജ്യുവല്‍ മേരി, കനിഹ എന്നിവർ നായികമാരായി എത്തുന്ന സിനിമയിൽ മണിയൻപിള്ള രാജുവിന്റെ മകനായ നിരഞ്ജനും ഒരു പ്രധാന കഥാപാത്രത്തെ അവതരിപ്പിക്കുമെന്ന് റിപ്പോർട്ടുണ്ടായിരുന്നു. എന്നാൽ, താരങ്ങളെ മാറ്റുമോയെന്ന കാര്യത്തിൽ തീരുമാനമായിട്ടില്ല.

നേരത്തേ ‘ബിലാത്തിക്കഥ’യിൽ മമ്മൂട്ടിയെ ആയിരുന്നു രഞ്ജിത് കാസ്റ്റ് ചെയ്തിരുന്നത്. എന്നാൽ, ഡേറ്റിന്റെ പ്രശ്നം മൂലം മമ്മൂട്ടി ചിത്രം വേണ്ടെന്ന് വെയ്ക്കുകയും മോഹൻലാലിനെ ആ സ്ഥാനത്തേക്ക് രഞ്ജിത് ക്ഷണിക്കുകയും ആയിരുന്നു. പക്ഷേ, ബിലാത്തിക്കഥ ഡേറ്റിന്റെ പ്രശ്നം മൂലം ചിത്രം ഇനി സാധ്യമാകില്ലെന്നാണ് റിപ്പോർട്ട്. ഇക്കാര്യത്തിൽ ഔദ്യോഗിക റിപ്പോർട്ടുകളൊന്നും വന്നിട്ടില്ല.