Mammootty: പുതിയ പടത്തിനു വേണ്ടിയാണോ ഈ രൂപമാറ്റം? വൈറലായി മമ്മൂട്ടിയുടെ പുതിയ ലുക്ക്
നവാഗതനായ ജിതിന്‍ കെ ജോസ് സംവിധാനം ചെയ്യുന്ന ചിത്രത്തിലാകും മമ്മൂട്ടി ഇനി അഭിനയിക്കുകയെന്നാണ് വിവരം
Mammootty: സോഷ്യല്‍ മീഡിയയില്‍ വൈറലായി മമ്മൂട്ടിയുടെ പുതിയ ലുക്ക്. താടിയെടുത്ത് മീശയിറക്കി കുറച്ചുകൂടി ചെറുപ്പമായിരിക്കുകയാണ് പുതിയ ചിത്രത്തില്‍ മലയാളത്തിന്റെ മെഗാസ്റ്റാര്‍. റോഷാക്കിലെ ലൂക്ക് ആന്റണിയെ ഓര്‍മപ്പെടുത്തുന്ന ലുക്കെന്നാണ് ആരാധകരുടെ അഭിപ്രായം. ഏത് സിനിമയ്ക്കു വേണ്ടിയാണ് മമ്മൂട്ടിയുടെ ഈ ഗെറ്റപ്പ് ചെയ്‌ഞ്ചെന്ന് വ്യക്തമല്ല.
നവാഗതനായ ജിതിന്‍ കെ ജോസ് സംവിധാനം ചെയ്യുന്ന ചിത്രത്തിലാകും മമ്മൂട്ടി ഇനി അഭിനയിക്കുകയെന്നാണ് വിവരം. ഈ സിനിമയ്ക്കു വേണ്ടിയാകും പുതിയ ലുക്കെന്ന് ആരാധകര്‍ കരുതുന്നു. സെപ്റ്റംബര് അവസാനത്തോടെയോ ഒക്ടോബര്‍ ആദ്യത്തിലോ ആയിരിക്കും ചിത്രീകരണം ആരംഭിക്കുക. ദുല്‍ഖര്‍ സല്‍മാന്‍ നായകനായ 'കുറുപ്പ്' എന്ന ചിത്രത്തിന്റെ തിരക്കഥാകൃത്താണ് ജിതിന്‍ കെ ജോസ്. മമ്മൂട്ടി കമ്പനിയായിരിക്കും ചിത്രം നിര്‍മിക്കുക. ജിതിന്‍ കെ ജോസ് തന്നെയാണ് തിരക്കഥ. ജോമോന്‍ ടി ജോണ്‍ ഛായാഗ്രഹണവും സുഷിന്‍ ശ്യാം സംഗീതവും നിര്‍വഹിക്കും. ത്രില്ലര്‍ ഴോണറില്‍ ആയിരിക്കും ചിത്രം ഒരുക്കുകയെന്നും റിപ്പോര്‍ട്ടുകളുണ്ട്.
അതേസമയം ഗൗതം വാസുദേവ് മേനോന്‍ സംവിധാനം ചെയ്ത ചിത്രത്തിലാണ് മമ്മൂട്ടി അവസാനമായി അഭിനയിച്ചത്. ഷെര്‍ലക് ഹോംസ് കഥകളില്‍ നിന്ന് സാരാംശം ഉള്‍ക്കൊണ്ട് ചെയ്യുന്ന ചിത്രത്തിന്റെ പേര് 'ഡൊമിനിക്ക് ആന്റ് ദി ലേഡീസ് പേഴ്സ്' എന്നാണ്. പ്രൈവറ്റ് ഡിറ്റക്ടീവ് ആയാണ് മമ്മൂട്ടി അഭിനയിക്കുക. മമ്മൂട്ടി കമ്പനി തന്നെയാണ് നിര്‍മാണം. ഗൗതം വാസുദേവ് മേനോന്‍ ആദ്യമായി മലയാളത്തില്‍ ചെയ്യുന്ന സിനിമ കൂടിയാണ് ഇത്.
