മുഖ്യമന്ത്രിയുടെ ദുരിതാശ്വാസനിധിയില്‍ രണ്ടു കോടി രൂപ സംഭാവന നല്‍കി നടന്‍ പ്രഭാസ്. കേരളം നേരിട്ട ഏറ്റവും വലിയ ദുരന്തമാണ് വയനാട്ടില്‍ സംഭവിച്ചതെന്നും ഈ സാഹചര്യത്തില്‍ എല്ലാവരും കേരളത്തിനൊപ്പം നിലകൊള്ളണമെന്നും പ്രഭാസ് പറഞ്ഞു. പ്രളയ കാലത്തും പ്രഭാസ് കേരളത്തെ സഹായിച്ചിരുന്നു. സിനിമാ മേഖലയില്‍നിന്ന് നിരവധി പേരാണ് ഉരുള്‍പൊട്ടല്‍ ദുരിതാശ്വാസനിധിയിലേക്ക് സംഭാവനകള്‍ നല്‍കിയത്. നേരത്തെ തെലുങ്ക് സിനിമ രംഗത്തുനിന്ന് ചിരഞ്ജീവിയും രാംചരണും അല്ലു അര്‍ജുനും സംഭാവനകള്‍ നല്‍കിയിരുന്നു.
ഒരു കോടി രൂപയാണ് ചിരഞ്ജീവിയും രാംചരണും ചേര്‍ന്ന് നല്‍കിയത്. അല്ലു അര്‍ജുന്‍ 25 ലക്ഷം രൂപ നല്‍കി. അതേസമയം തമിഴ് സിനിമയില്‍ നിന്നും നിരവധി സംഭാവനകള്‍ ലഭിച്ചു. മലയാളത്തിലെ നടന്മാരും ദുരിതാശ്വാസനിധിയിലേക്ക് സംഭാവനകള്‍ നല്‍കി.
