ടെയ്‌ലർ എന്തിന് നാക്ക് പുറത്തിടുന്നു? അതിന് പിന്നിലും ഒരു കഥയുണ്ട്

അഞ്ച് മത്സരങ്ങളടങ്ങിയ ടി20 പരമ്പര തൂത്തുവാരിയതിന്റെ ആത്മവിശ്വാസത്തിലാണ്  ന്യൂസിലൻഡിനെതിരെ ആദ്യ ഏകദിന മത്സരത്തിന് ഇന്ത്യ മൈതാനത്തിലേക്കിറങ്ങിയത്. 347 എന്ന മികച്ച സ്കോർ തന്നെ ഇന്ത്യ നേടിയെടുത്തെങ്കിലും വെറ്ററൻ താരമായ റോസ് ടെയ്‌ലറിന്റെ തകർപ്പൻ സെഞ്ച്വറിയുടെ മികവിൽ കിവികൾ വിജയിക്കുകയായിരുന്നു.

മത്സരത്തിൽ സെഞ്ച്വറി നേടി കിവീസ് താരം റോസ് ടെയ്‌ലർ സെഞ്ച്വറി നേടിയതിനൊപ്പം തന്നെ നാക്ക് പുറത്തേക്കിട്ട് ആഘോഷിക്കുന്ന ടെയ്‌ലറുടെ രീതി വലിയ ചർച്ചയായിരുന്നു. സെഞ്ച്വറി നേടുമ്പോളെല്ലാം ടെയ്‌ലർ ഇത്തരത്തിൽ നാക്ക് പുറത്തേക്ക് ഇടാറുണ്ട്. സെഞ്ച്വറി നേട്ടത്തിൽ ടെയ്‌ലറെ അഭിനന്ദിച്ചുകൊണ്ട് മുൻ ഇന്ത്യൻ താരം ഹർഭജൻ സിംഗ് ചെയ്ത ട്വീറ്റ് ചെയ്തതോടെയാണ് വിഷയം ചർച്ചയായത്.

സെഞ്ചുറിയടിച്ചാല്‍ താങ്കളെന്തിനാണ് ഇങ്ങനെ നാക്ക് പുറത്തിടുന്നത് എന്ന് എനിക്കൊന്ന് പറഞ്ഞുതരാമോ എന്നായിരുന്നു ഭാജിയുടെ ട്വീറ്റ് ഇതിന് പിന്നാലെ ഐ.പി.എല്‍ ഫ്രാഞ്ചൈസിയായ ചെന്നൈ സൂപ്പര്‍ കിങ്‌സും ഭാജിയുടെ ഈ ട്രോളിനൊപ്പം ചേര്‍ന്നു. എന്നാൽ നാക്ക് പുറത്തിടുന്ന ടെയ്‌ലറിന്റെ ആഘോഷത്തെ പറ്റി മുൻപ് തന്നെ അദ്ദേഹം വിശദീകരിച്ചിട്ടുണ്ട്.2015-ല്‍ ക്രിക്കറ്റ് ഡോട്ട്‌കോം എയുവിന് അനുവദിച്ച അഭിമുഖത്തിലാണ് ടെയ്‌ലര്‍ സംഭവത്തെ പറ്റി വിശദമാക്കിയത്.

കരിയറിന്റെ തുടക്കത്തിൽ സെഞ്ച്വറി നേടിയിട്ടും പലവട്ടം ടീമിൽ നിന്നും പുറത്താക്കപ്പെട്ടിട്ടുണ്ട്. അതിന് ശേഷമാണ് സെഞ്ചുറി അടിച്ചശേഷം ഇങ്ങനെ നാക്ക് പുറത്തിട്ട് തുടങ്ങിയതെന്നും ടെയ്‌ലര്‍ വിശദീകരിച്ചു. താൻ ഇങ്ങനെ ചെയ്യുന്നത് മക്കൾക്കും ഇഷ്ടമുള്ള കാര്യമാണെന്നും ടെയ്‌ലർ കൂട്ടിച്ചേർത്തു.