ഹിന്ദിയില്‍ അജയ് ദേവ്‌ഗണിന്‍റെ സിങ്കം 3 വരുന്നു, അതായത് നമ്മുടെ ആക്ഷന്‍ ഹീറോ ബിജു!

തമിഴകത്താണ് ആദ്യം സിങ്കം ഗര്‍ജ്ജിച്ചത്. ഹരിയുടെ സംവിധാനത്തില്‍ സൂര്യ നായകനായ ആ സിനിമ കളക്ഷന്‍ റെക്കോര്‍ഡുകള്‍ ഭേദിച്ചു. പിന്നീട് സിങ്കം 2, എസ് 3 എന്നിങ്ങനെ സിങ്കത്തിന് തുടര്‍ച്ചകളുമുണ്ടായി.

സിങ്കം അതേ പേരില്‍ രോഹിത് ഷെട്ടി ഹിന്ദിയിലേക്ക് റീമേക്ക് ചെയ്തപ്പോല്‍ അജയ് ദേവ്‌ഗണ്‍ ആയിരുന്നു നായകന്‍. പിന്നീട് ആ സിനിമയുടെ രണ്ടാം ഭാഗം സിങ്കം റിട്ടേണ്‍സ് ചെയ്തപ്പോള്‍ അതും ഹിറ്റായി.

അജയ് ദേവ്ഗണിനെ നായകനാക്കി സിങ്കം 3 ചെയ്യാനുള്ള പദ്ധതിയിലാണ് ഇപ്പോള്‍ രോഹിത് ഷെട്ടി. സൂര്യയുടെ ‘എസ് 3’ റീമേക്ക് ചെയ്യാമെന്നായിരുന്നു ആദ്യം ആലോചനയെങ്കിലും ഇപ്പോള്‍ അതില്‍ മാറ്റം സംഭവിച്ചിരിക്കുന്നു എന്നാണ് പുതിയ വാര്‍ത്ത.

അജയ് ദേവ്ഗണിന്‍റെ സിങ്കം 3 ആകുന്നത് നമ്മുടെ സ്വന്തം ‘ആക്ഷന്‍ ഹീറോ ബിജു’ ആണ്. എബ്രിഡ് ഷൈന്‍ സംവിധാനം ചെയ്ത് നിവിന്‍ പോളി നായകനായ മലയാളത്തിന്‍റെ ക്ലാസിക് സിനിമയാണ് ഹിന്ദിയില്‍ സിങ്കം 3 എന്ന പേരില്‍ അടിച്ചുപൊളിക്കാന്‍ പോകുന്നത്.

ഒരു കാര്യത്തിലേയുള്ളൂ സംശയം. സിങ്കം, സിങ്കം റിട്ടേണ്‍സ് എന്നീ അജയ് ദേവ്ഗണ്‍ സിനിമകള്‍ ആക്ഷന്‍ പവര്‍ പാക്ഡ് ത്രില്ലറുകളായിരുന്നു. ആക്ഷന്‍ ഹീറോ ബിജു ആകട്ടെ ഒരു സാധാ സബ് ഇന്‍സ്പെക്ടറുടെ ഔദ്യോഗിക ജീവിതത്തിലെ ചില സംഭവങ്ങള്‍ കോര്‍ത്തിണക്കിയ ലളിതമായ സിനിമയും. സിങ്കം 3 ആയി ഇത് റീമേക്ക് ചെയ്യുമ്പോള്‍ എന്തൊക്കെ മാറ്റങ്ങളാണോ വരുത്തുന്നത്? കണ്ടറിയുകതന്നെ.