പവി ടേക്ക് കെയര്‍ അവസാന പിടിവള്ളി, പിടിച്ചുനില്‍ക്കണമെങ്കില്‍ സിനിമ വിജയിപ്പിക്കണമെന്ന് ദിലീപ്

മലയാള സിനിമയില്‍ തിളങ്ങിനിന്നിരുന്ന നായകനടനാണെങ്കിലും തുടര്‍ച്ചയായ പരാജയങ്ങള്‍ കാരണം മലയാള സിനിമയിലെ സ്ഥാനം ഏറെക്കുറെ നഷ്ടമായ അവസ്ഥയിലാണ് ജനപ്രിയ നായകന്‍ ദിലീപ്. വമ്പന്‍ ബജറ്റില്‍ വന്ന ആക്ഷന്‍ സിനിമയായ ബാന്ദ്രയും തങ്കമണി സംഭവത്തെ ആസ്പദമാക്കിയൊരുക്കിയ തങ്കമണിയും ബോക്‌സോഫീസില്‍ തകര്‍ന്നടിഞ്ഞിരുന്നു. രാമലീലയാണ് അവസാനമായി തിയേറ്ററുകളില്‍ വിജയിച്ച ദിലീപ് സിനിമ. ഈ സാഹചര്യത്തില്‍ തന്റെ ഏറ്റവും പുതിയ സിനിമയായ പവി ടേക്ക് കെയര്‍ തിയേറ്ററില്‍ വിജയിപ്പിക്കണമെന്ന് ആവശ്യപ്പെട്ടിരിക്കുകയാണ് താരം.

ഡിയര്‍ ഫ്രണ്ടിന് ശേഷം വിനീത് കുമാര്‍ സംവിധാനം ചെയ്യുന്ന സിനിമ ഏപ്രില്‍ 26നാണ് റിലീസ്. പതിവ് ദിലീപ് സിനിമകളെ പോലെ കോമഡി ട്രാക്ക് ഉള്‍ക്കൊണ്ടുള്ള സിനിമയാകും പവി ടേക്ക് കെയര്‍ എന്ന സൂചനയാണ് സിനിമയുടെ ട്രെയ്‌ലര്‍ നല്‍കുന്നത്. സിനിമയുടെ ഓഡിയോ ലോഞ്ച് ചടങ്ങിലാണ് സിനിമ വിജയിക്കേണ്ടത് തന്റെ നിലനില്‍പ്പിന്റെ പ്രശ്‌നമാണെന്ന് ദിലീപ് പറഞ്ഞത്. ഇത് എന്റെ 149മത് സിനിമയാണ്. ഇത്രയും കാലം ഞാന്‍ ഒരുപാട് ചിരിച്ചു. ചിരിപ്പിച്ചു. കഴിഞ്ഞ കുറെ കാലങ്ങളായി ഞാന്‍ ദിവസവും കരഞ്ഞുകൊണ്ടിരിക്കുന്ന ആളാണ്. ചിരിപ്പിക്കാന്‍ ശ്രമിക്കുന്ന എനിക്ക് ഇവിടെ നിലനില്‍ക്കാന്‍ ഈ സിനിമ വളരെ ആവശ്യമാണ്. എന്റെ പ്രേക്ഷകരെ വിശ്വസിച്ചുകൊണ്ട് മാത്രമാണ് ഈ സിനിമ തിയേറ്ററുകളിലെത്തുന്നത്. നിങ്ങളിത് വിജയിപ്പിക്കണം. ദിലീപ് പറഞ്ഞു.