ജവാൻ ദീപിക- ഷാറൂഖ് സിനിമയാക്കി, നയൻസിനെ സൈഡാക്കി, ആറ്റ്‌ലിയോട് നയൻതാരയ്ക്ക് അതൃപ്തി, ബോളിവുഡിലേയ്ക്ക് ഉടനില്ലെന്ന് റിപ്പോർട്ട്

ബോളിവുഡില്‍ ഷാറൂഖ് ഖാനെ നായകനാക്കി തമിഴ് സംവിധായകനായ ആറ്റ്‌ലി ഒരുക്കിയ ജവാന്‍ കളക്ഷന്‍ റെക്കോര്‍ഡുകള്‍ ഭേദിച്ച് മുന്നേറികൊണ്ടിരിക്കുകയാണ്. ഷാറൂഖ് ഇരട്ടവേഷത്തിലെത്തിയ ചിത്രത്തില്‍ നയന്‍താരയാണ് നായിക. ദീപികയും ഒരു പ്രധാനകഥാപാത്രമായി ചിത്രത്തിലുണ്ട്. സിനിമ മികച്ച വിജയം നേടി മുന്നേറുമ്പോഴും തന്റെ ബോളിവുഡ് അരങ്ങേറ്റത്തില്‍ നയന്‍സ് തൃപ്തയല്ലെന്നാണ് പുറത്ത് വരുന്ന റിപ്പോര്‍ട്ടുകള്‍.

താരവും ചിത്രത്തിന്റെ നിര്‍മാതാവും ഉടനൊന്നും ഇനി ബോളിവുഡ് സിനിമകള്‍ ചെയ്യാനുള്ള മാനസികാവസ്ഥയിലല്ലെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. സിനിമയില്‍ നയന്‍താരയുടെ റോള്‍ വെട്ടികുറച്ചതിലും ദീപികയുടെ കഥാപാത്രത്തെ ഉയര്‍ത്തി കാണിക്കാന്‍ ശ്രമിച്ചതിലും താരത്തിന് സംവിധായകനോട് അതൃപ്തിയുണ്ടെന്നാണ് റിപ്പോര്‍ട്ട്. നായിക കഥാപാത്രമല്ലാതിരുന്നിട്ടും പ്രേക്ഷകരുടെ മനസ്സില്‍ ഇടം ലഭിക്കുന്ന പോലെയാണ് ചിത്രത്തില്‍ ദീപികയുടെ റോള്‍. തെന്നിന്ത്യയിലെ ലേഡി സൂപ്പര്‍ സ്റ്റാറായ നയന്‍താരയെ ജവാനില്‍ ഒതുക്കികളഞ്ഞെന്നും ഇതില്‍ താരത്തിന് നിരാശയുണ്ടെന്നുമാണ് റിപ്പോര്‍ട്ടുകള്‍ പറയുന്നത്.