Shaktiman: ബേസിലിന്റെ അടുത്ത സിനിമ ശക്തിമാന്‍ തന്നെ, സിനിമ ഓണ്‍ എന്ന് സോണി പിക്‌ചേഴ്‌സ്

രണ്‍വീര്‍ സിങ്ങിനെ നായകനാക്കി ബേസില്‍ ജോസഫ് ഒരുക്കുന്ന ശക്തിമാന്‍ താത്കാലികമായി നിര്‍ത്തിവെച്ചെന്ന വാര്‍ത്തയില്‍ പ്രതികരണവുമായി സോണി പിക്‌ചേഴ്‌സിന്റെ ജനറല്‍ മാനേകറും ഹെഡുമായ ലാഡ സിങ്ങ്. സിനിമ ഓണ്‍ ആണെന്നും സിനിമയെ പറ്റി പുറത്തുവന്ന വാര്‍ത്തകള്‍ തെറ്റാണെന്നും ലാഡ സിങ്ങ് ഇന്‍സ്റ്റഗ്രാമിലൂടെ അറിയിച്ചു.

ബേസില്‍ ജോസഫിന്റെ കഥ രണ്‍വീര്‍ സിങ്ങിന് ഇഷ്ടമായെന്നും എന്നാല്‍ സിനിമയ്ക്കായി 550 കോടിയോളം മുടക്കുന്നത് നഷ്ടമാകുമെന്ന വിലയിരുത്തലില്‍ സിനിമ ഉപേക്ഷിക്കപ്പെട്ടെന്നും നേരത്തെ വാര്‍ത്തകള്‍ വന്നിരുന്നു. ഈ വാര്‍ത്തയുടെ സ്‌ക്രീന്‍ ഷോട്ടിനൊപ്പമാണ് സിനിമ ഓണ്‍ ആണെന്ന കാര്യം സോണി അറിയിച്ചത്. ദൂരദര്‍ശനില്‍ 1997 മുതല്‍ 2000 ന്റെ പകുതി വരെ സംപ്രേക്ഷണം ചെയ്ത ശക്തിമാന്‍ ഇന്ത്യയെങ്ങും വലിയ ജനപ്രീതി നേടിയ പരമ്പരയാണ്. മുകേഷ് ഖന്നയായിരുന്നു പരമ്പരയില്‍ ശക്തിമാനായി വേഷമിട്ടത്.