തെന്നിന്ത്യന്‍ സിനിമയിലെ സൂപ്പര്‍ നായികയായ അനുഷ്ക ഷെട്ടി മലയാളത്തില്‍ ആദ്യമായി അഭിനയിക്കുന്ന സിനിമയായ കത്തനാരിലെ താരത്തിന്റെ ക്യാരക്ടര്‍ പോസ്റ്റര്‍ പുറത്ത്. അനുഷ്‌കയുടെ ജന്മദിനത്തോട് അനുബന്ധിച്ചാണ് മോഷന്‍ പോസ്റ്റര്‍ സിനിമയുടെ അണിയറപ്രവര്‍ത്തകര്‍ പുറത്തുവിട്ടത്.
സിനിമയില്‍ നിള എന്ന കഥാപാത്രമായാണ് അനുഷ്ക എത്തുന്നത്. പ്രിയപ്പെട്ട അനുഷ്ക ഷെട്ടിക്ക് മാജിക്കലായ ഒരു ജന്മദിനം ആശംസിക്കുന്നു. കത്തനാര്‍ ദ വൈല്‍ഡ് സോര്‍സറര്‍ എന്ന സിനിമയിലെ ആകര്‍ഷകമായ കഥാപാത്രത്തിലൂടെ മലയാള സിനിമയിലേക്ക് ഗംഭീരമായ ചുവടുവെയ്പ്പ് നടത്തുകയാണ് അനുഷ്ക എന്ന കുറിപ്പോടെയാണ് വീഡിയോ.
ഹോം സിനിമയുടെ സംവിധായകനായ റോജിന്‍ തോമസ് ഒരുക്കുന്ന സിനിമ മലയാളത്തിലെ ഏറ്റവും ചെലവേറിയ സിനിമയാണ്. ബിഗ് ബജറ്റില്‍ ഒരുങ്ങുന്ന സിനിമയില്‍ ജയസൂര്യയാണ് കടമറ്റത്ത് കത്തനാരായി എത്തുന്നത്. 2 ഭാഗങ്ങളായി ഒരുങ്ങുന്ന സിനിമയില്‍ പ്രഭുദേവയും മറ്റൊരു പ്രധാന കഥാപാത്രത്തെ അവതരിപ്പിക്കുന്നു. ഗോകുലം മൂവീസിന്റെ ബാനറില്‍ ഗോകുലം ഗോപാലനാണ് സിനിമ നിര്‍മിക്കുന്നത്.
