ഒരുകാലത്ത് ഇന്ത്യൻ നിരത്തുകളിൽ നിറസാനിധ്യമായിരുന്ന പ്രിയ വാഹനം ചേതക്കിനെ ബജാജ് തിരികെ കൊണ്ടുവരുന്നു എന്ന വാർത്ത തന്നെ വലിയ സ്വീകാര്യത നേടിയിരുന്നു. ഇൽക്ട്രിക് സ്കൂട്ടറായാണ് ചേതക്കിന്റെ മടങ്ങി വരവ്. തുടക്കത്തിൽ കെടിഎം ഡീലർഷിപ്പുകൾ വഴിയായിരിക്കും പുതിയ ചേതക്ക് വിപണിയിലെത്തുക എന്നാണ് റിപ്പോർട്ടുകൾ.
പുതിയ ചേതക്കിനെ തേടിയെത്തുന്നവർക്ക് പ്രീമിയം അനുഭവം നൽകുന്നതിനായാണ് കെടിഎം ഡീലർഷിപ്പുകൾ വഴി വാഹനത്തെ ആദ്യ ഘട്ടത്തിൽ വിപണിയിൽ എത്തിക്കുന്നത്. ബജാജ് ഡീലർഷിപ്പുകളെ പ്രീമിയം നിലവാരത്തിലേക്ക് ഉയർത്തിയ ശേഷം. വാഹനത്തെ ബജാജ് ഡീലർഷിൽപ്പുകളിലേക്ക് തന്നെ മാറ്റിയേക്കും.
ബജാജിന്റെ പുതിയ അർബണെറ്റ് ബ്രാൻഡിലാണ് ചേതക്ക് വിപണിയിലെത്തുന്നത്. പുതിയ ചേതക്കിനെ ബജാജ് ഈമാസം 17ന് ഇന്ത്യൻ വിപണിയിൽ അൺവീൽ ചെയ്തിരുന്നു. അടുത്ത വർഷം ജനുവരിയോടെ വാഹനം വിപണിയിലെത്തും. പൂനെയിലെ ചകാൻ പ്ലാന്റിൽ ചേതക്ക് ഇലക്ട്രിക്കിന്റെ നിർമ്മാണം ബജാജ് നേരത്തെ ആരംഭിച്ചിരുന്നു. ആദ്യ ഘട്ടത്തിൽ പൂനെയിൽ മാത്രമായിരിക്കും വാഹനം വിൽപ്പനെക്കെത്തുക പിന്നീട് ബംഗളുരുവിലും തുടർന്ന് മറ്റു പ്രമുഖ നഗരങ്ങളിലേക്കും വ്യാപിപ്പിക്കാനാണ് ബജാജ് ലക്ഷ്യം വക്കുന്നത്.
ചേതക് എന്ന പേര് നൽകിയെങ്കിലും രൂപത്തിൽ പഴയ ചേതക്കുമായി വിദൂര സാമ്യം മാത്രമേ പുതിയ ഇലക്ട്രിക് ചേതക്കിനൊള്ളു. റെട്രോ ഡിസൈൻ ശൈലിയിലാണ് വാഹനത്തെ ഒരുക്കിയിരിക്കുന്നത്. സ്നാർട്ട്‌ഫോണുകളുമായി കണക്ട് ചെയ്യാവുന്ന ഒരു സ്മാർട്ട് ഇലക്ട്രിക് സ്കൂട്ടറായാന് ചേതക് ഇലക്ട്രിക് വിപണിയിൽ എത്തുക. സിറ്റി, സ്പോർട്ട്സ് എന്നിങ്ങനെ രണ്ട് റൈഡിംഗ് മോഡുകൾ ചേതക്കിൽ ഉണ്ടാവും
സിറ്റി മോഡിൽ 95 മുതൽ 100 കിലോമീറ്റർ വരെയും, സ്പോർട്ട്സ് മോഡിൽ 85 കിലോമീറ്ററും താണ്ടാൻ സ്കൂട്ടറിനാകും. IP67 റേറ്റിങ്ങുള്ള ഹൈടെക് ലിഥിയം ആയൺ ബാറ്ററിയാണ് ചേതക്കിൽ ഉണ്ടാവുക. എന്നാൽ വാഹനത്തിലെ ഇലക്ട്രിക് മോട്ടോർ സംബന്ധിച്ച വിവരങ്ങൾ കമ്പനി പുറത്തുവിട്ടിട്ടില്ല. പുതിയ ഇലക്ട്രിക് ചേതക്കിന്റെ വില ബജാജ് പ്രഖ്യാപിച്ചിട്ടില്ല എങ്കിലും ഒന്നര ലക്ഷത്തിൽ കൂടുതൽ വാഹനത്തിന് വില വരില്ല എന്ന് വ്യക്തമാക്കിയിട്ടുണ്ട്.
