കനത്ത മഴയിലും മണ്ണിടിച്ചിലിലും ഹിമാചലിൽ കുടുങ്ങിയത് 30 മലയാളികൾ അടങ്ങുന്ന സംഘം. നടി മഞ്ജു വാര്യർ അടങ്ങുന്ന സംഘമാണ് ഹിമാചലിൽ കുടുങ്ങിയിരിക്കുന്നത്. സനല്‍കുമാര്‍ ശശിധരന്റെ പുതിയ സിനിമയുടെ ഷൂട്ടിംഗിനായി എത്തിയതാണ് മഞ്ജുവും സംവിധായകനും അടക്കമുള്ളവര്‍.
കുളു മണാലിയില്‍ നിന്നും 82 കിലോമീറ്റര്‍ മാറി സ്ഥിതി ചെയ്യുന്ന ഛത്രു എന്ന പ്രദേശത്താണ് നടിയും സംവിധായകനും ഷൂട്ടിംഗ് സംഘവും കുടുങ്ങി കിടക്കുന്നത്. കനത്ത മണ്ണിടിച്ചിലും മഴയും കാരണം സംഘത്തിന് ഛത്രുവില്‍ നിന്നും പുറത്തു കടക്കാന്‍ സാധിച്ചിട്ടില്ല.
ഇന്നലെ രാത്രി മഞ്ജുവാര്യര്‍ നേരിട്ട് സഹോദരൻ മധു വാര്യരെ വിളിച്ചു വിവരം പറഞ്ഞതോടെയാണ് സംഭവം പുറത്തറിഞ്ഞത്. രണ്ട് ദിവസത്തേക്കുള്ള ഭക്ഷണം മാത്രമാണ് ഇവരുടെ കൈയില്‍ ഉള്ളതെന്നാണ് സൂചന. തിരിച്ച് വിളിക്കാൻ ശ്രമിച്ചിട്ട് ആർക്കും ബന്ധപ്പെട്ടവരെ ലഭിക്കുന്നുമില്ല.
അതേസമയം വിഷയം ശ്രദ്ധയില്‍പ്പെട്ടിട്ടുണ്ടെന്നും ഷൂട്ടിംഗ് സംഘത്തെ രക്ഷപ്പെടുത്താന്‍ വേണ്ട നടപടികള്‍ തുടങ്ങിയിട്ടുണ്ടെന്നും കേന്ദ്രമന്ത്രി വി മുരളീധരന്‍ അറിയിച്ചു. ഹിമാചല്‍ പ്രദേശ് മുഖ്യമന്ത്രിയുമായി ഇക്കാര്യം സംസാരിച്ചിട്ടുണ്ടെന്നും മുരളീധരന്‍ അറിയിച്ചു.
