ഭാര്യയുമായി തർക്കം; മദ്യപിച്ചെത്തിയ പിതാവ് രണ്ട് മക്കളെയും കൊലപ്പെടുത്തി
ആറും മൂന്നും വയസുള്ള കുട്ടികളാണ് കൊല്ലപ്പെട്ടത്.
മദ്യപിച്ചെത്തി ഭാര്യയുമായി വഴക്കിട്ട ശേഷം പെൺമക്കളെ കൊലപ്പെടുത്തിയ പിതാവ് അറസ്റ്റിൽ. ആറും മൂന്നും വയസുള്ള കുട്ടികളാണ് കൊല്ലപ്പെട്ടത്.ഉത്തർപ്രദേശിലെ സുരാജ്പൂരിലാണ് സംഭവം.സംഭവത്തിൽ ഹരി സോളാങ്കി എന്നയാളെ പോലീസ് അറസ്റ്റ് ചെയ്തു.
സോളാങ്കി മദ്യപിച്ചെത്തിയ ശേഷമാണ് കുട്ടികളെ കൊലപ്പെടുത്തിയതെന്ന് ഭാര്യ പറഞ്ഞതായി പോലീസ് സൂപ്രണ്ട് രൺവിജയ് സിങ് പറഞ്ഞു. കുട്ടികളിൽ ഒരാളുടെ മൃതദേഹം വീട്ടിലും മറ്റൊരാളുടേത് ഉപേക്ഷിക്കപ്പെട്ട കെട്ടിടത്തിൽ നിന്നുമാണ് കണ്ടെത്തിയതെന്ന് പോലീസ് പറഞ്ഞു.
കുട്ടികളെ കൊലപ്പെടുത്തിയ ശേഷം പ്രതി ഒളിവിൽ പോവുകയും എന്നാൽ പിന്നീട് പിടികൂടുകയുമായിരുന്നു. കുട്ടികളുടെ തലയിൽ മർദ്ദനമേറ്റതിന്റെ പാടുകൾ ഉണ്ടായിരുന്നതായി പോലീസ് വ്യക്തമാക്കി. സംഭവത്തിൽ എഫ്ഐആർ രജിസ്റ്റർ ചെയ്തിട്ടുണ്ടെന്നും കൂടുതൽ അന്വേഷണം നടന്നുവരികയാണെന്നും പോലീസ് പറഞ്ഞു.
