സിനിമ ഇല്ലാതായത് ദിലീപിന്റെ ഒതുക്കല്‍ മൂലമോ ?; നടിയെ ആക്രമിച്ചതിലെ സത്യം പുറത്തുവരണം: ഹരിശ്രീ അശോകന്‍
സിനിമ ഇല്ലാതായത് ദിലീപിന്റെ ഒതുക്കല്‍ മൂലമോ ?; നടിയെ ആക്രമിച്ചതിലെ സത്യം പുറത്തുവരണം: ഹരിശ്രീ അശോകന്‍
കൊച്ചിയില്‍ യുവനടിയെ തട്ടിക്കൊണ്ടു പോയി ഉപദ്രവിച്ച കേസില്‍ ദിലീപ് അറസ്‌റ്റിലായ സംഭവത്തില്‍ പ്രതികരണവുമായി നടന്‍ ഹരിശ്രീ അശോകന്‍ രംഗത്ത്.
സത്യം പുറത്തുവരണമെന്നാണ് ഞാന്‍ ആഗ്രഹിക്കുന്നത്. നടന്നത് എന്താണെന്ന് തനിക്കറിയില്ല. എനിക്കറിയാവുന്ന ദിലീപ് ഇങ്ങനെയൊന്നും ചെയ്യില്ല. ഞങ്ങള്‍ തമ്മില്‍ വര്‍ഷങ്ങള്‍ നീണ്ട ബന്ധമുണ്ട്. ഇപ്പോള്‍ കേള്‍ക്കുന്ന വാര്‍ത്തകള്‍ വിശ്വസിക്കുന്നില്ലെന്നും അശോകന്‍ പറഞ്ഞു.
തെളിവുകള്‍ ഉണ്ടെന്നു പറയുന്നതല്ലാതെ എന്ത് തെളിവാണ് ഉള്ളതെന്ന് വ്യക്തമല്ല. പൊലീസ് അന്വേഷണം നടത്തട്ടെ. അതിനു മുമ്പ് എങ്ങനെയാണ് അദ്ദേഹത്തെ പഴിക്കാനാകുക. കുറ്റം ചെയ്‌തിട്ടില്ലെങ്കില്‍ ദിലീപ് ശിക്ഷിക്കപ്പെടരുത്. അങ്ങനെ സംഭവിക്കില്ലെന്നാണ് കരുതുന്നതെന്നും ഹരിശ്രീ അശോകന്‍ വ്യക്തമാക്കി.
ദിലീപിന്റെ കുടുംബവുമായി അടുത്ത ബന്ധമാണുള്ളത്. അനൂപിനെയും അമ്മയേയും അടുത്തറിയാം. എന്നെ സിനിമയില്‍ നിന്നും ആരും ഉതുക്കിയിട്ടില്ല. ചാനല്‍ ചര്‍ച്ച കാണുന്നയാളോ സോഷ്യല്‍ മീഡിയയില്‍ സജീവമായയാളോ അല്ല. എനിക്ക് അറിയാവുന്ന ജോലിയാണ് ഞാന്‍ ചെയ്യുന്നത്. പൊലീസിന്റെ അന്വേഷണത്തിലിരിക്കുന്ന കേസാണിത്. അതിനാല്‍ കൂടുതല്‍ സംസാരിക്കാന്‍ ഇല്ലെന്നും അശോകന്‍ കൂട്ടിച്ചേര്‍ത്തു.
കേസിന്റെ എല്ലാ വശങ്ങളും പുറത്തു വരട്ടെ അപ്പോള്‍ സംസാരിക്കാമെന്നും അശോകന്‍ പറഞ്ഞു.
