ഓരോ ഐപിഎൽ സീസണിലും ഏറ്റവും കൂടുതൽ പ്രതിഫലം ആരാണ് സ്വന്തമാക്കാറുള്ളതെന്ന് നമ്മള്‍ പലപ്പോഴും ശ്രദ്ധിക്കുന്നതാണ്. അന്താരാഷ്ട്ര ക്രിക്കറ്റിലെ മികച്ച പ്രകടനങ്ങളുടെ ബലത്തില്‍ തന്നെയാണ് ഐപിഎല്‍ താരലേലത്തിലും താരങ്ങളുടെ വില ഉയരാള്ളുള്ളത്. ഐപിഎല്ലില്‍ നിന്നും ഇതുവരെയായി ഇന്ത്യന്‍ ക്രിക്കറ്റിലെ വമ്പന്‍ താരങ്ങള്‍ എത്ര പ്രതിഫലമാണ് സ്വന്തമാക്കിയിട്ടുള്ളതെന്ന് നോക്കാം.
ഇന്ത്യയുടെ മാസ്റ്റര്‍ ബ്ലാസ്റ്ററായ സച്ചിന് ടെന്‍ഡുല്‍ക്കര്‍ ആറ് സീസണുകളാണ് ഐപിഎല്ലില്‍ കളിച്ചത്. ആദ്യ സീസണില്‍ മുംബൈ ഇന്ത്യന്‍സിന്റെ ഐക്കള്‍ താരമായിരുന്ന സച്ചിന് ആദ്യ പ്രതിഫലം പ്രതിവര്‍ഷം 4.5 കോടി രൂപയായിരുന്നു. ആദ്യ 3 സീസണുകളിലും ഇതേ പ്രതിഫലത്തില്‍ കളിച്ച സച്ചിന്റെ പ്രതിഫലം 2011 മുതല്‍ 8.2 കോടിയായി ഉയര്‍ന്നു. പിന്നീട് 3 വര്‍ഷം ഇതേ പ്രതിഫലത്തില്‍ കളിച്ച സച്ചിന് ഐപിഎല്ലില്‍ പ്രതിഫലമായി ലഭിച്ചത് 38,29,5000 രൂപയാണ്.
സച്ചിന് ശേഷം ഇന്ത്യയുടെ സൂപ്പര്‍ താരമായി വളര്‍ന്ന വിരാട് കോലിയ്ക്ക് 2008ലെ അരങ്ങേറ്റ സീസണില്‍ ലഭിച്ചത് 12 ലക്ഷം രൂപ മാത്രമായിരുന്നു. ആദ്യ 3 സീസണില്‍ ഇത് തന്നെയായിരുന്നു കോലിയുടെ പ്രതിഫലം. എന്നാല്‍ 2011ല്‍ ഇത് ഒറ്റയടിക്ക് 8 കോടി രൂപയായി. 2014ല്‍ 12.5 കോടിയായും 2018 മുതല്‍ 21 വരെ 17 കോടിയായും ഇത് ഉയര്‍ന്നു.അവസാന 2 സീസണുകളില്‍ 15 കോടിയാണ് താരത്തിന്റെ പ്രതിഫലം. ഐപിഎല്ലില്‍ നിന്നും പ്രതിഫലയിനത്തില്‍ മാത്രം 173 കോടി രൂപയാണ് കോലി സ്വന്തമാക്കിയത്.
2008ലെ ആദ്യ സീസണില്‍ പക്ഷേ 3 കോടി രൂപയ്ക്കാണ് യുവതാരമായ രോഹിത് ശര്‍മയെ ഡെക്കാന്‍ ചാര്‍ജേഴ്‌സ് അന്ന് സ്വന്തമാക്കിയത്. ആദ്യ 3 സീസണുകളില്‍ ഇത് തന്നെയായിരുന്നു രോഹിത്തിന്റെ പ്രതിഫലം. 2011ല്‍ 9 കോടിയ്ക്ക് രോഹിത്തിനെ മുംബൈ സ്വന്തമാക്കി. 2014ല്‍ 12.5 കോടിയായും 2018ല്‍ 15 കോടിയായും 2022ല്‍ 16 കോടിയായും രോഹിത്തിന്റെ പ്രതിഫലം ഉയര്‍ന്നു. ഇതുവരെ പ്രതിഫലയിനത്തില്‍ രോഹിത് നേടിയത് 178 കോടിയാണ്.
2008ല്‍ 6 കോടിയെന്ന വമ്പന്‍ തുകയ്ക്കാണ് അന്നത്തെ ഇന്ത്യന്‍ ടി20 നായകനായ എം എസ് ധോനി ചെന്നൈ ടീമിലെത്തിയത്. 2011ല്‍ ഇത് 8 കോടിയായും 2014ല്‍ 12.5 കോടിയായും 2019ല്‍ 15 കോടിയായും മാറി. 2022ല്‍ ഇത് 12 കോടിയായി കുറഞ്ഞു. ആകെ 176 കോടിയാണ് ധോനി പ്രതിഫല ഇനത്തില്‍ ഐപിഎല്ലില്‍ നിന്നും നേടിയത്.
മലയാളി താരമായ സഞ്ജു സാംസന്റെ കാര്യമെടുത്താല്‍ 2012ല്‍ 8 ലക്ഷം രൂപയ്ക്കാണ് താരം കൊല്‍ക്കത്ത നൈറ്റ് റൈഡേഴ്‌സിലെത്തുന്നത്. 2013ല്‍ 10 ലക്ഷം രൂപയ്ക്ക് താരത്തെ രാജസ്ഥാന്‍ സ്വന്തമാക്കി. 2014,2015 സീസണുകളില്‍ 4 കോടി മുടക്കി താരത്തെ രാജസ്ഥാന്‍ നിലനിര്‍ത്തി. 2017ലും 2018ലും 4.2 കോടിയ്ക്കാണ് സഞ്ജു ഡല്‍ഹി ഡെയര്‍ ഡെവിള്‍സിനായി കളിച്ചത്. എന്നാല്‍ 2018ല്‍ 8 കോടി രൂപയ്ക്ക് സഞ്ജു രാജസ്ഥാനില്‍ തിരിച്ചെത്തി. 2022ല്‍ രാജസ്ഥാന്‍ നായകനായതോടെ പ്രതിഫലം 14 കോടിയായി മാറി. 12 ഐപിഎല്‍ സീസണുകളിലായി പ്രതിഫലയിനത്തില്‍ 76.5 കോടിയാണ് സഞ്ജു ഇതുവരെ നേടിയത്.
