അപരാജിത കുതിപ്പില്‍ റെക്കോര്‍ഡിട്ട് ജര്‍മന്‍ ക്ലബായ ബയേര്‍ ലെവര്‍കൂസന്‍ യൂറോപ്പ ലീഗ് ഫുട്‌ബോള്‍ ഫൈനലില്‍. സെമി ഫൈനല്‍ രണ്ടാം പാദമത്സരത്തില്‍ റോമക്കെതിരെ (2-2) സമനില നേടിയതോടെ ഇരുപാദങ്ങളിലുമായി 4-2ന്റെ വിജയം നേടിയാണ് ലെവര്‍കൂസന്‍ ഫൈനലില്‍ പ്രവേശിച്ചത്. റോമയുടെ മൈതാനത്ത് നടന്ന ആദ്യപാദ സെമിയില്‍ ലെവര്‍കൂസന്‍ എതിരില്ലാത്ത 2 ഗോളുകള്‍ക്ക് ജയിച്ചിരുന്നു.
എല്ലാ പ്രധാന ടൂര്‍ണമെന്റുകളിലുമായി ലെവര്‍കൂസന്‍ പരജായമറിയാതെ പൂര്‍ത്തിയാക്കുന്ന 49മത് മത്സരമായിരുന്നു ഇത്. ഇതോടെ യൂറോപ്പിലെ മേജര്‍ ടൂര്‍ണമെന്റുകളില്‍ ഏറ്റവും കൂടുതല്‍ മത്സരങ്ങള്‍ തോല്‍വിയറിയാതെ പൂര്‍ത്തിയാക്കുന്ന ടീമെന്ന റെക്കോര്‍ഡ് ജര്‍മന്‍ ക്ലബ് സ്വന്തമാക്കി. 1963-65 കാലഘട്ടത്ത് പോര്‍ച്ചുഗീസ് ക്ലബായ ബെന്‍ഫിക്ക കുറിച്ച റെക്കോര്‍ഡാണ് ബയേര്‍ ലെവര്‍കൂസന്‍ മറികടന്നത്. മെയ് 23ന് നടക്കുന്ന യൂറോപ്പ കപ്പ് ഫൈനലില്‍ അറ്റ്‌ലാന്റയാണ് ലെവര്‍കൂസന്റെ എതിരാളികള്‍.
